Baramati News : बारावीच्या 120 विद्यार्थींनींना जावे लागले वसतिगृहाबाहेर; बारामतीतील घटनेनंतर मुलींना कमालीचा मनस्ताप

बारामती - शहरातील एका पतसंस्थेच्या कर्जाला जामीनदार असलेल्या व्यक्तीच्या इमारतीचा ताबा घेण्याच्या प्रकरणात आज अनेक विद्यार्थींनीना अचानकच रस्त्यावर यावे लागले.

शहरातील एका पतसंस्थेच्या कर्जप्रकरणास जामीनदार असलेल्या कर्जदाराच्या इमारतीचा ताबा घेण्याची प्रक्रीया बुधवारी (ता. 12) सकाळी सुरु झाली. या प्रकाराची माहिती या इमारतीत वास्तव्यास असलेल्या एका अँकेडमीच्या शंभराहून अधिक विद्यार्थींनीना नव्हती. अचानकच सामान खोलीतून काढण्यास प्रारंभ झाल्यानंतर तेथे गोंधळाचे वातावरण पसरले. अनेक विद्यार्थींनीना या प्रकाराने रडू कोसळले. विद्यार्थींनींचे सामान अक्षरशः रस्त्यावर आणून टाकण्यात आले.

मात्र या प्रकरणात मिळालेल्या माहितीनुसार वर्षभरापूर्वी मुंबई उच्च न्यायालयात विहीत मुदतीत कर्जाची रक्कम भरतो अशी ग्वाही संबंधित जामीनदाराने दिली होती, त्या नंतर न्यायालयाने ती मुदत टाकून जप्तीला स्थगिती दिली होती, मात्र या मुदतीत ही रक्कम संबंधिताने भरली नाही, कालांतराने न्यायालयातून त्यांनी दावाही काढून घेतल्याने बुधवारी पतसंस्थेने कायदेशीररित्या हा ताबा घेतला.

यामध्ये पालकांना हा प्रकार समजल्यानंतर पालकही संतप्त झाले होते, अँकेडमीला संबंधित जामीनदाराने हा प्रकार कळविला नाही का, यात विद्यार्थींनीना काहीही चूक नसताना जो कमालीचा मनस्ताप झाला, त्या बद्दल पालकांनी संताप व्यक्त केला.

या वसतिगृहात इयत्ता बारावीच्या 120 विद्यार्थींनी होत्या, त्यांचा गुरुवारी (ता. 13) मराठीचा पेपर असल्याने मुलींच्या मनोधैर्यावरही याचा विपरीत परिणाम झाला. दरम्यान अँकेडमी चालकांनी या विद्यार्थींनीची वास्तव्याची तात्पुरती सोय केली असून एक दोन दिवसात त्यांची नव्याने सोय करणार असल्याचे अँकेडमीचालकांनी सांगितले.