जुन्नर (पुणे) : लॉकडाउनमध्ये जुन्नरला बोडकेनगर येथे पुतण्याकडे राहण्यास आलेल्या गणपत लक्ष्मण गायकवाड (वय 63) यांना पोलिस असल्याचे सांगून त्यांच्याजवळील सोन्याचे दागिने लंपास करण्यात आले.
गायकवाड हे सकाळी फिरण्यासाठी निघाले होते. त्यावेळी पंचलिंग चौकाचे पुढे शिवनेरी किल्ल्याच्या रस्त्याने चालत जात असताना त्यांच्याजवळ पाठीमागून एक व्यक्ती आली. ती त्यांना म्हणाली, "काका, मी तुम्हाला कधीपासून आवाज देत आहे, पण तुम्ही ऐकले नाही. म्हणून मी तुमच्याजवळ आलो आहे.' त्यामुळे गायकवाड यांनी त्याला, "तू कशासाठी मला आवाज देतो?' असे विचारले. त्यावर तो म्हणाला, "मी पोलिसवाला आहे, या परिसरात म्हाताऱ्या माणसांकडे चरस, गांजा सापडलेला आहे. मला तुमची अंगझडती घ्यावी लागेल.' त्यावर गायकवाड म्हणाले, "तुम्ही पोलिस आहात, तर मग पोलिस स्टेशनला चला.'
त्यांचे संभाषण सुरू असताना शिवनेरी किल्ल्याकडून एक मोटारसायकलस्वार आला. त्यालाही त्याने बोलावून घेतले व "मी पोलिस आहे, तुझ्याजवळ असणाऱ्या सर्व वस्तू रुमालामध्ये टाकून दे, त्यावस्तू मी तुला नंतर परत करतो.' त्यावर त्या मोटारसायकलस्वाराने त्याच्याजवळ असणाऱ्या वस्तू रुमालात टाकून त्याच्याकडे दिल्या. त्यानंतर त्यास त्याने बाजूला उभे राहण्यास सांगितले. त्यानंतर तो व्यक्ती गायकवाड यांना म्हणाला, "तुमच्याकडील असलेल्या सर्व वस्तू रुमालात टाकून द्या.'
त्यानुसार गायकवाड यांनी त्यांच्याकडे असणारी चुना डबी व सॅनिटायझरची बाटली त्या रूमालात टाकली. त्यानंतर त्याने गायकवाड यांना त्यांच्या हातात असणाऱ्या अंगठ्या व गळ्यात असणारी चैन रूमालात टाकण्यास सांगितले. त्यानुसार त्यांनी हातात असणाऱ्या सोन्याच्या तीन अंगठ्या, एक चांदीची अंगठी व गळ्यात असणारी सोन्याची चैन त्याला दिली. त्याने ते खिशात टाकले. त्यामुळे गायकवाड त्याला म्हणाले," अंगठ्या व चैन खिशात का टाकतो?' त्यावर त्याने, "मी तुमच्या सर्व वस्तू तुम्हाला नंतर परत करतो,' असे म्हणून चुना डबी व सॅनिटायझरची बाटली परत केली व जोरात धक्का देऊन पळत जाऊन रस्त्याच्या बाजूला उभ्या असलेल्या मोटारसायकलस्वाराच्या मागे बसून निघून गेला.
या प्रकारात गायकवाड यांचे एक लाख 50 हजार 300 रुपये किमतीचे सोन्याचे पाच तोळा वजनाचे दागिने लंपास झाले असल्याची फिर्याद त्यांनी दोन अनोळखी व्यक्तींच्या विरोधात जुन्नर पोलिसांकडे दिली आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.