Trupti Desai : 'त्यांना' जाऊन 24 तासही होत नाहीत तोच..; तृप्ती देसाई राजकारण्यांना म्हणाल्या 'निर्लज्ज'

Trupti Desai News : पुण्यात (Pune) आज सर्वपक्षीय दिवाळी फराळ कार्यक्रमाचं आयोजन करण्यात आलं होतं. पुण्यातील फर्ग्युसन महाविद्यालय (Fergusson College) रोडवर असलेल्या वाडेश्वर हॉटेलमध्ये या फराळ कार्यक्रमाचं आयोजन करण्यात आलं होतं. या कार्यक्रमाला भाजप, राष्ट्रवादी, काँग्रेस, शिवसेना (उद्धव बाळासाहेब ठाकरे), मनसेचे पदाधिकारी उपस्थित होते.

मात्र, या "सर्वपक्षीय दिवाळी कट्ट्याला" भूमाता ब्रिगेडच्या (Bhumata Brigade) तृप्ती देसाई (Trupti Desai) यांनी कडाडून विरोध दर्शवलाय. तृप्ती देसाईंनी फेसबुकवर पोस्ट लिहित हा विरोध दर्शविलाय. देसाईंनी आपल्या फेसबुक पोस्टमध्ये लिहिलंय, आज वाडेश्वर कट्ट्यावर सर्वपक्षीय राजकीय लोकप्रतिनिधींसाठी सकाळी फराळ आयोजित करण्यात आला होता. खरंतर हा कार्यक्रम पुढं ढकलता आला असता. कारण, कालच पुण्यात पंधरा वर्षे आमदार असलेले विनायक आबा निम्हण (Vinayak Nimhan) यांचं अचानक निधन झालं. त्यांना जाऊन 24 तासही झाले नाहीत आणि आज फराळ करताना, पदार्थांवर ताव मारताना वाडेश्वर कट्ट्यावर दिसलेले आबांचे हे सर्वच सहकारी आणि जवळचे मित्र एन्जॉय करताना दिसले.

कदाचित, कट्ट्यावर श्रद्धांजलीही यांनी वाहिली असेल. परंतु, त्यांना दिलेला अग्नी अजूनही शांत झालेला नसताना हे जे सर्व झालं त्याचा आम्ही निषेधच करतो. आबांवर जी वेळ आली, ती सर्वांवरच एक दिवस येणार आहे. परंतु, राजकारणी इतके निर्लज्ज कसे काय असू शकतात हाच मोठा प्रश्न माझ्यासारख्या कार्यकर्तीला पडलेला आहे, असं देसाईंनी नमूद केलंय.