डॉक्टरांच्या हलगर्जीपणामुळे गेला 'ती'चा जीव; तिघांविरोधात गुन्हा दाखल

पुणे : मणक्‍याच्या आजारावर उपचार करण्यासाठी रुग्णालयात दाखल झालेल्या महिलेच्या मृत्यूस जबाबदार ठरल्याप्रकरणी तीन डॉक्‍टरांविरोधात खडक पोलिसांनी गुन्हा दाखल केला. भवानी पेठेतील जी. एम. बाबूभाई हॉस्पिटलमध्ये ही घटना घडली होती.

या प्रकरणी डॉ. गुलाम अहमद मुर्तजा खान, डॉ. अमित मुजुमदार, डॉ. फरहान शेख यांच्या विरोधात गुन्हा दाखल करण्यात आला. सहायक पोलिस निरीक्षक चंद्रकांत गोसावी यांनी या संदर्भात खडक पोलिस ठाण्यात फिर्याद दिली. संबंधित रुग्णालयात नंदा थोरात (रा.अहमदाबाद) यांचा 5 जून रोजी मृत्यू झाला होता. थोरात यांना मणक्‍याचा त्रास होत होता. 29 मे रोजी त्या रुग्णालयात उपचारासाठी दाखल झाल्या होत्या. उपचारादरम्यान थोरात यांचा मृत्यू झाल्यानंतर शवविच्छेदन करण्यात आले होते.

- पुणे महापालिकेने 'अनलॉक-४'ची नियमावली केली जाहीर; वाचा कोणत्या गोष्टी सुरू आणि बंद राहणार​

थोरात यांचा मुलगा प्रवीण यांनी खडक पोलिसांकडे तक्रार अर्ज दिला होता. डॉक्‍टरांच्या हलगर्जीपणामुळे आईचा मृत्यू झाल्याची तक्रार त्यांनी अर्जात केली होती. त्यामुळे पोलिसांनी व्हिसेरा राखून ठेवला होता. वैद्यकीय अहवाल, जबाब, शवविच्छेदन अहवाल ससून रुग्णालयातील वैद्यकीय अधीक्षकांकडे पोलिसांनी दिला होता. तज्ज्ञ डॉक्‍टरांच्या समितीने डॉ. खान, डॉ. मुजुमदार, डॉ. शेख यांची चौकशी केली. हलगर्जीपणामुळे रुग्णाचा मृत्यू झाल्याचे निरीक्षण चौकशीत नोंदविण्यात आल्यानंतर याबाबतचा अहवाल पोलिसांना देण्यात आला. त्यानंतर या प्रकरणात तीनही डॉक्‍टरांविरोधात गुन्हा दाखल करण्यात आला.

- पुण्याच्या बातम्या वाचण्यासाठी येथे ► क्लिक करा

(Edited by : Ashish N. Kadam)