चारचाकी टोइंग करून नेत असल्यानं तरुणांची सटकली; कर्मचाऱ्यांवर केली दगडफेक

पुणे : नो पार्किंगमध्ये पार्क केलेल्या चारचाकी टोइंग करून नेत असल्याचे पाहून सहा जणांच्या टोळक्‍याने टोइंग व्हॅनमधील कर्मचाऱ्यांवर दगडफेक केली. तसेच तेथे उपस्थित असलेल्या महिला पोलिस कर्मचाऱ्याला अपशब्द वापरले. बुधवारी (ता. 6) दुपारी तीन वाजण्याच्या सुमारास विश्रांतवाडी येथील ऑरबीट मॉलसमोर हा प्रकार घडला.

दगडफेक करणाऱ्यांनी सरकारी कामात अडथळा आणल्याबाबत सहा जणांवर गुन्हा दाखल करण्यात आला आहे. पोलिस नाईक वंदना संजय आल्हाट (वय 42) यांनी या बाबत फिर्याद दिली आहे. पोलिसांनी दिलेल्या माहितीनुसार, फिर्यादी या विश्रांतवाडी वाहतूक विभागात पोलिस नाईक म्हणून नेमणुकीस आहेत.

- पुणे : तनिष्क ज्वेलर्समधून महिलांनी 4 लाखाच्या सोन्याच्या बांगड्या केल्या लंपास!

बुधवारी दुपारी त्या आणि त्यांच्यासोबतचे कर्मचारी नो पार्किंगमधील चार चाकी गाड्यांवर कारवाई करत होते. त्यावेळी आरोपींनी फिर्यादीजवळ येऊन त्यांना शिवीगाळ केली. तसेच बेकायदेशीररीत्या जमाव जमवून फिर्यादी यांच्या टोइंग व्हॅन आणि सहकाऱ्यांवर दगडफेक तसेच धक्काबुक्की केली. त्यामुळे आरोपींवर सरकारी कामात अडथळा आणण्याचा गुन्हा दाखल करण्यात आला आहे. गुन्ह्याचा पुढील तपास पोलिस उपनिरीक्षक सुरेश अनेचा करीत आहे.

- पुण्यातील इतर बातम्या वाचण्यासाठी क्लिक करा

(Edited by: Ashish N. Kadam)