सोमवती असूनही जेजुरीत उधळला नाही भंडारा...

जेजुरी (पुणे) : खंडोबाची सोमवती यात्रा रद्द करण्यात आली होती. मात्र, यात्रेनिमित्त होणारे पारंपारिक विधी आज सकाळी जेजुरी गडावर पार पडले. काही मोजक्याच पुजारी, सेवक व मानकरी यांच्या उपस्थितीत खंडोबाचे सोमवती स्नान, पूजा, अभिषेक आदी विधी पार पडले. भाविकांविना व भंडाऱ्याविना प्रथमच यंदा सोमवती यात्रा पार पडली.

 इंधन दरवाढीचा वेग सुसाट, डिझेलची दरवाढ सुरूच

सोमवारी अमावस्या आली की जेजुरीत खंडोबाची सोमवती यात्रा भरते. यात्रेनिमित्त राज्यभरातून भाविक येत असतात. आज दिवस भर अमावस्या असल्याने भर सोमवती यात्रा होती. मात्र, कोरोनाच्या पार्श्वभूमीवर सोमवती यात्रा रद्द करण्यात आली होती. मात्र, खंडोबाचे सोमवतीनिमित्त होणारे धार्मिक विधी काही मोजक्याच पुजारी, सेवक, मानकरी यांच्या उपस्थितीत पार पडले. आज सकाळीच सहा वाजता दही, दुध व कऱ्हेच्या पाण्याने स्नान करण्यात आले. पूजा व अभिषेक करण्यात आला. या वेळी मुख्य मानकरी राजेंद्र पेशवे, सचिन पेशवे, ग्रामस्थ मंडळाचे अध्यक्ष गणेश आगलावे, सुधीर गोडसे, कृष्णा कुदळे, जालिंदर खोमणे, संतोष खोमणे, अशोक खोमणे, सुधीर गोडसे, अमोल शिंदे, अविनाश सातभाई, मयूर दिडभाई, मुन्ना बारभाई आदी मोजकेच मानकरी, पुजारी व सेवकांच्या उपस्थितीत विधी पार पडला.

पुण्याच्या इतर बातम्या वाचण्यासाठी येथे क्लिक करा

यानिमित्त गाभाऱ्यामध्ये फुलांची सजावट करण्यात आली होती. भाविकांसाठी मात्र मंदीर बंदच ठेवण्यात आले होते. भाविकाविना सोमवती यात्रा होण्याची ही पहिलीच वेळ आहे. सोमवतीचा पालखी सोहळा पाहण्यासारखा असतो. या शिवाय कऱ्हा नदीवर सोमवती स्नानाचा कार्यक्रमही जल्लोषपूर्ण असतो. भंडाऱ्याची उधळण आणि भाविकांचा उत्साह यंदा मात्र पाहण्यास मिळाला नाही. कोरोनाचे संकट लवकर दूर होवो, असे साकडे या वेळी खंडोबाला घालण्यात आले. देवसंस्थानच्यावतीने आवश्यक त्या सुविधा पुरविण्यात आल्या. शहरात पोलिस बंदोबस्त ठेवण्यात आला होता.