कोथरुडकर झालेत आक्रमक; वीज बिल भरणा केंद्रावर गोंधळ​

कोथरुड (पुणे) : वीजबिल जास्त का या प्रश्नावर समाधानकारक उत्तर न मिळत नसल्याने नागरिकांनी रामबाग कॉलनी येथील वीज बिल भरणा केंद्रावर गोंधळ घालायला सुरुवात केली. कर्मचा-यांनी अधिकारी व पोलिसांना बोलावले. वीजमंडळाचे कार्यकारी अभियंता अमित बारटक्के यांनी लोकांच्या शंकाचे निरसन करत त्यांना शांत राहण्याचे आवाहन केले.

- ताज्या बातम्यांसाठी डाऊनलोड करा ई-सकाळचे ऍप

यावेळी बारटक्के म्हणाले की, प्रत्येक ग्राहकाचे विजबिल पाहून त्यानुसार शंका निरसन करण्यासाठी रोज पन्नास लोकांना बोलावण्यात येईल. तक्रार निवारण खिडकीवर एकाच वेळी अनेकांनी गोंधळ घातला तर कर्मचा-याला शंका निरसन करणे जड जाते. तरी नागरिकांनी सहकार्य करावे. किष्किंधानगर येथे राहणा-या सुरेखा मंगेश खंडागळे म्हणाल्या की, एक फॅन, लाईट, टीव्ही आमच्याकडे आहे. दर महिन्याला दोनशे ते तीनशे बिल यायचे. मागच्या महिन्यातच 1270 रुपये बिल भरले तर आत्ता परत 3360 रुपये बिल आले. आम्ही धुणी भांडी करतो. काम बंद आहे. वापर न करताही जर एवढे बिल आले तर आम्ही काय करायचे.

- पुण्याच्या बातम्या वाचण्यासाठी येथे ► क्लिक करा ​

दिनेश माथवड म्हणाले की, मला महिन्याला अडीच हजार बिल यायचे. यावेळी एकदम वीस हजार रुपये बिल आले. वीज मंडळाने दंड, विलंब आकार ग्राहकांवर लादू नये अशी आमची मागणी आहे. मिटर रीडींग न घेता अंदाजे बिल आकारण्यात आल्याने लोकांना मानसिक त्रास झाला आहे. पुन्हा पाहणी करुन दुरुस्त वीज बिल द्यावे.

हे वाचा - शांत बेलबाग चौक अन् निवांत पोलिस ; अनंत चतुर्दशीचे दुर्मिळ दृष्य

लक्ष्मण साठे म्हणाले, आमचे बिल माफ करु नका. ज्याला दोनशे रुपये बिल यायचे. त्याला हजार रुपये येत असल्यामुळे शंका निर्माण झाली आहे. बहुतेक लोक गावाला होती. घर बंद असताना जास्त बिल कसे अशी लोकांची शंका आहे. गणेश भेलके, नीरा गोरखे, सुवर्णा संतोष पवार, अलका तोष्णीवाल, आशा कडू आदींनी आपल्या तक्रारी अधिका-यांपुढे मांडल्या.

जो पर्यंत शंका दूर होणार नाही, तोपर्यंत कोणाचेही वीज मिटर बंद होणार नाही. तीन कर्मचारी आहेत. लेखी अर्ज द्या. आम्ही टोकन नंबर देऊ. फोन करुन तुम्हाला बोलवण्यात येईल. तेथे तुमच्या शंकांचे निरसन करु. गरज पडल्यास जास्त कर्मचारी वाढवू.

-अमित बारटक्के,  कार्यकारी अभियंता, वीजमंडळ