शहरी गरीबच्या लाभापासून नागरिकांना रोखू नये

पुणे : महापालिकेतर्फे एक लाखाहून कमी वार्षिक उत्पन्न असणाऱ्या नागरिकांसाठी ‘शहरी-गरीब योजना’ राबविली जाते. यामध्ये आता पुन्हा एकदा १४० रुग्णालयांचा समावेश करण्यात आला आहे. तसेच मिळकतींची माहिती काढून जास्त उत्पन्न असल्याचा ठपका ठेवून कोणालाही या योजनेपासून रोखता येणार नाही अशी सूचना स्थायी समितीने प्रशासनाला केली आहे. स्थायी समिती अध्यक्ष हेमंत रासने यांनी सांगितले. (PMC News)

महापालिका प्रशासनाने शहरी गरीब योजनेसाठी १४० रुग्णालयाशी महापालिकेने करार केले होते. पण राज्य शासनाच्या महात्मा फुले आरोग्यदायी योजना व इतर योजना ११ रुग्णालयांमध्ये असल्याने या रुग्णालयातील शहरी गरीब योजना महापालिकेने बंद केली. त्यामुळे रुग्णांची मोठी गैरसोय होत होती. खासगी रुग्‌णालयात छोट्या-मोठ्या आजारांसाठी, शस्त्रक्रियेसाठी दाखल होणाऱ्या रुग्णांना आर्थिक सवलत मिळते. हृदयरोग, किडनी, कॅन्सर सारख्या मोठ्या आजारातील रुग्णांसाठी ही योजना लाभदायक असे असताना रुग्णालये वगळण्यात आले होते.

आता पुन्हा या रुग्णालयांचा समावेश केला जाणार आहे. गेल्या वर्षी या योजनेचा लाभ घेतलेल्या मिळकतकरधारक किंवा सदनिकाधारक लाभार्थ्यांच्या चौकशी करून त्यांना नोटिसा बजावण्यात आलेल्या आहेत. लाभार्थी मिळकतकरधारक किंवा सदनिकाधारक नसावा अशी कुठलीच अट या नियमावलीत नसल्याने उत्पन्न एक लाखांपेक्षा अधिक असेलच असे ही नाही. त्यामुळे मिळकतकरधारक आहे म्हणून या लाभार्थ्यांना योजनेतून वगळता येणार नाही अशा सूचना प्रशासनाला केल्या आहेत, असे रासने यांनी सांगितले.

देशाच्या स्वातंत्र्याच्या अमृत महोत्सवी वर्षानिमित्त महापालिकेतर्फे १५ ऑगस्ट २०२२ पर्यंत विविध उपक्रम राबविण्यास स्थायी समितीने मान्यता दिली. हुतात्मा दिन, क्रांतिदिन, प्रजासत्ताकदिन विविध उपक्रमांनी साजरे केले जाणार आहेत. फरासखाना येथील क्रांतिकारक पांडुरंग कर्णिक यांच्या स्मारकाचे सुशोभीकरण करण्यात येणार आहे. क्रांतिकारकांच्या छायाचित्रांचे प्रदर्शन भरविण्यात येणार आहे. स्वातंत्र्य सैनिकांच्या निवासस्थानांवर कृतज्ञता फलक लावणे आदी उपक्रम राबविले जाणार आहे.