Crime : पुण्यातील वर्दळीच्या एफसी रोडवर तुंबळ हाणामारी; दुकानातील कर्मचारी आपआपसात भिडले

पुणे - एकमेकांच्या दुकानात येणाऱ्या ग्राहकांवरुन सुरू झालेला वाद थेट मारामारीपर्यंत पोहचला आहे. ही सगळी घटना मंगळवारी दुपारी १२.३० वाजण्याच्या सुमारास घडली. तुषार अल्हाट यांनी या प्रकरणी डेक्कन पोलिस ठाण्यात तक्रार दिली आहे.

या प्रकरणी महेश नायक (२४), सूरज कालगुडे (२१), अमित देशपांडे (२६), विशाल उकिर्डे (२१) यांना अटक केली आहे. पोलिसांनी दिलेल्या माहितीनुसार, ग्राहकांना दुकानात येऊन खरेदी करावी यासाठी एफसी रोड वरील अनेक दुकानातील कर्मचारी मोठं मोठ्याने ओरडून आकर्षित करत असतात. दरम्यान, घडलेला प्रकार देखील अशाच प्रकारचा आहे.

अटकेतील आरोपी यांच्यासह इतर ४ ते ५ जण हे एफसी रोडवरील वेगवेगळ्या दुकानात कामाला आहेत. आपल्या दुकानात येऊन ग्राहकांनी खरेदी करावी यासाठी या सर्वांमध्ये चढाओढ सुरू असते. मंगळवारी दुपारी या आरोपींनी एकमेकांच्या दुकानात येणाऱ्या ग्राहकांवरुन वाद घातला. हा वाद विकोपाला गेला आणि त्यांच्यात शिवीगाळ होऊन मारामारी पर्यंत पोहोचला. या घटनेमुळे परिसरात गोंधळ उडाला होता.

या प्रकरणी आरोपींवर भारतीय दंडात्मक कलम १४३, १४५ ,१४६, १६०, ५०४, ५०६, ३२३ अन्वये गुन्हा दाखल करण्यात आला असून डेक्कन पोलिस पुढील तपास सुरू आहे.