Sharad Pawar : आता एवढं बोलले तर राष्ट्रपती राजवट का लागली तेही सांगा? - देवेंद्र फडणवीस

पहाटेचा शपथविधी झाला नसता तर राष्ट्रपती राजवट उठली नसती, अशा आशयाचं विधान राष्ट्रवादीचे अध्यक्ष शरद पवार यांनी केलं. या विधानानंतर राजकीय वर्तुळात वेगवेगळ्या चर्चांना उधाण आलं आहे. दरम्यान, याच विधानावर उपमुख्यमंत्री देवेंद्र फडणवीस यांनी प्रत्युत्तर दिलं आहे.

माध्यमांशी बोलताना फडणवीस म्हणाले, "बरं झालं की आता त्यांनी स्वत:च याबद्दलचा खुलासा केला आहे. आता एवढं बोलले तर राष्ट्रपती राजवट का लागली, या पाठीमागे कोण होतं, कोणाच्या सांगण्यावरून लागली, त्याचं नेमकं कारण काय अशा सगळ्या गोष्टींचाही ते खुलासा करतील ही माझी अपेक्षा आहे. या सगळ्या कड्या जोडल्या तर सगळ्या गोष्टी अजून स्पष्ट होतील."

काय म्हणाले शरद पवार?

पुण्यातल्या एका पत्रकार परिषदेत बोलताना शरद पवार म्हणाले, "पहाटेच्या शपथविधीबाबत अजित पवारांनी बोलण्याची गरज नाही. काही गोष्टींबाबत तसंही बोलण्याची गरज नसते. पहाटेचा शपथविधी झाला नसता तर महाराष्ट्रातील राष्ट्रपती राजवट उठली असती का? उद्धव ठाकरे मुख्यमंत्री झाले असते का?"