Vijaystambha : जिल्हाधिकारी डॉ राजेश देशमुख यांनी विजयस्तंभ अभिवादन कार्यक्रमाचा घेतला आढावा

वाघोली : पेरणे फाटा येथे एक जानेवारी 2023 रोजी होणाऱ्या विजयस्तंभ अभिवादन कार्यक्रमाच्या नियोजनाबाबत जिल्हाधिकारी डॉ.राजेश देशमुख यांनी आढावा घेतला. तसेच विजयस्तंभ परिसरास भेट देऊन पाहणी केली. देशभरातील अनुयायी एक जानेवारी रोजी कोरेगाव भीमा येथे अभिवादन करण्यासाठी येतात. त्यांना सुविधा उपलब्ध करून देण्यासाठी आवश्यक नियोजन करावे. त्यासाठी प्रत्येक विभागाने समन्वयक अधिकारी नेमावा. येणाऱ्या अनुयायांना कोणतीही समस्या येणार नाही याची दक्षता घ्यावी व नियोजित वेळेत आवश्यक काम पूर्ण करावे असे निर्देश त्यांनी अधिकाऱ्यांना दिले.

विजयस्तंभ परिसरात नियोजनाशी संबंधित अधिकाऱ्यांची त्यांनी बैठक घेतली. आरोग्य, सार्वजनिक बांधकाम, जिल्हा परिषद, पीएमपीएमएल, अग्निशमन, सार्वजनिक बांधकाम, विद्युत विभाग आदी विविध विभागांच्या नियोजनाचा आढावा घेतला. तसेच वाहनतळ व इतर व्यवस्थेसंबंधी ठिकाणांना भेट देऊन तेथील तयारीचा आढावा घेतला. यावेळी पोलीस सहआयुक्त संदीप कर्णिक, पोलीस अधीक्षक अंकित गोयल,अपर पोलीस आयुक्त नामदेव चव्हाण, उपविभागीय अधिकारी संजय आसवले, तहसीलदार किरण सुरवसे, गट विकास अधिकारी प्रशांत शिर्के, लोणीकंदचे वरिष्ठ पोलीस निरीक्षक गजानन पवार, विजयस्तंभ स्मारक समितीचे पदधिकारी उपस्थित होते.