कोरोना रुग्ण वाढीचा धोका; कोविड केअर सेंटरच्या कर्मचाऱ्यांची पुनर्नियुक्ती

पुणे - जिल्ह्याच्या ग्रामीण भागातील कोरोनाचा संसर्ग वेगाने वाढू लागल्याने, कोविड केअर सेंटर आणि समर्पित कोविड रुग्णालयात कंत्राटी तत्त्वावर काम करत असलेल्या अधिकारी व कर्मचाऱ्यांना जिल्हा परिषदेने पुनर्नियुक्ती दिली आहे. पूर्वनियोजनानुसार हे सर्व अधिकारी आणि कर्मचारी ३१ मार्चपर्यंत नियुक्त करण्यात आले होते. या पुनर्नियुक्तीमुळे या सर्वांना आणखी तीन महिने मुदतवाढ मिळाली आहे. मार्चअखेरपर्यंत 25 टक्के मनुष्यबळ ठेवण्याची सूचना राज्य सरकारने केली होती. परंतु वाढती रुग्णसंख्या पाहता, सर्वांना पुन्हा तीन महिन्यांकरिता पुनर्नियुक्ती देण्यात आली आहे. जिल्हा परिषदेचे मुख्य कार्यकारी अधिकारी आयुष प्रसाद यांनी सर्व गटविकास अधिकाऱ्यांना तसा आदेश दिला आहे.

- ताज्या बातम्यांसाठी डाऊनलोड करा ई-सकाळचे ऍप

- पुण्याच्या बातम्या वाचण्यासाठी येथे ► क्लिक करा

यामुळे पुन्हा एकदा कोविड केअर सेंटरसह अन्य सर्व आरोग्य संस्था पुन्हा नव्या जोमाने कोरोना रुग्णांवरील उपचारासाठी सज्ज होणार आहेत. या नव्या आदेशामुळे सर्वांना आता येत्या ३० जूनपर्यंत मुदतवाढ मिळाली आहे. राज्य सरकारच्या आदेशानुसार नवीन अधिकारी व कर्मचाऱ्यांना नव्याने नियुक्त करता येणार नाही. शिवाय वारंवार गैरहजर राहणारे आणि रुग्णांवरील उपचारांबाबत हलगर्जीपणा करत असलेल्या तक्रारी प्राप्त झालेल्या कर्मचाऱ्यांना पुन्हा नियुक्त्या न देण्याचा आदेशही आयुष प्रसाद यांनी दिला आहे.

Edited By - Prashant Patil