आळंदीकरांना धोक्याचा इशारा...पालिकेतील एवढ्या कर्मचाऱ्यांना कोरोनाची लागण

आळंदी (पुणे) : आळंदी पालिकेतील एका अधिकाऱ्याला व एका कर्मचारी महिलेला कोरोनाची बाधा झाली. तीन आठवड्यांपूर्वी पालिकेच्या एका कर्मचाऱ्याला कोरोना झाला होता. परिणामी कोरोनाने आळंदी पालिकेत प्रवेश केला असून, आता पालिका कार्यालयच कोरोनापासून सुरक्षित नसल्याचे चित्र आहे. शहरात आज सहा जणांना कोरोनाची लागण झाली असून, आजपर्यंत बाधितांची संख्या तब्बल पंचावन्न झाली. 

 इंधन दरवाढीचा वेग सुसाट, डिझेलची दरवाढ सुरूच

आळंदी पोलिस ठाण्यातील अधिकाऱ्यांसह सात पोलिस कर्मचाऱ्यांना तीन आठवड्यांपूर्वी कोरोना पॉझिटिव्ह होता. यातील सर्वजण बरे झाले. आता नगरपालिकेच्या कर्मचाऱ्यांनाही बाधा होत असल्याचे समोर आले आहे. एक महिला कर्मचारी सध्या कोरोनाने बाधीत आहे. तर, आळंदी पालिकेतून बदली झालेल्या एका अधिकाऱ्यालाही कोरोनाची लागण झाली असून, ते उपचार करून घरी परतले. त्यातच आज सहा जणांचे अहवाल पॉझिटिव्ह आले. परिणामी एक महिलेचा मृत्यू वगळता आळंदीतील कोरोनाच्या आजारावर उपचार घेऊन बरे होण्याचे प्रमाण जास्त आहे. मात्र, तरीही कोरोनाचा संसर्ग थांबण्याचे चिन्ह नाहीत.  

आळंदीत लॉकडाउन आहे. अत्यावश्यक सेवेव्यतिरिक्त इतर व्यवहार बंद आहेत. पालिकेने शिक्षकांची नेमणूक करून घरोघरी जाऊन नागरिकांची तपासणी करण्याचे काम सुरू केले आहे. ऑक्सीजन पातळी आणि शरीराचे तापमान तपासणीचे काम सध्या सुरू आहे. नऊ प्रभागात एकशे आठ शिक्षकांची नेमणूक मुख्याधिकारी अंकुश जाधव यांनी केली आहे. मात्र, तरीही रूग्णांची संख्या काही कमी होईना.
 

पुण्याच्या इतर बातम्या वाचण्यासाठी येथे क्लिक करा

आळंदीत धर्मशाळा, मंगल कार्यालये, शिक्षण संस्था मोठ्या प्रमाणात आहेत. प्रशासनाने आळंदी आणि परिसरातील गावांतील रूग्णांना महाळुंगे अथवा पिंपरीतील वायसीएम रूग्णालयात जायला लागू नये, यासाठी आळंदीतच कोविड सेंटर उभारण्याची मागणी होत आहे. महाळुंगे येथील कोविड सेंटरमध्ये जाण्यासाठी प्रवासाचीही सर्वसामान्य नागरिकांची अडचण होत आहे. आळंदीत सर्वसोईयुक्त कोविड सेंटर उभारल्यास आळंदीसह परिसरातील गावच्या नागरिकांची सोय होईल, या अपेक्षेने नागरिक कोविड सेंटरची मागणी करत आहेत.