पुणे महापालिकेकडून 'कोविड शववाहिनी' अ‍ॅप; स्मशानभूमीही लगेच कळणार

पुणे: पुण्यात रोज कोरोनाने सरासरी दीडशे जणांचा मृत्यू होत आहे. पण रुग्णवाहिका मिळण्यापासून ते अंतविधीसाठी स्मशानभूमी मिळे पर्यंत नागरिकांचे प्रचंड हाल होत आहेत. ही समस्या दूर करण्यासाठी महापालिकेने खास ‘कोविड शव वाहिनी’ हे ॲप तयार केले आहे. त्यावर रुग्णवाहिका मिळणार आहेच, पण त्याचबरोबर कोणत्या स्मशानभूमीत लगेच अंत्यसंस्कार होतील याची माहीत नातेवाईक, रुग्णालय व शववाहिकेच्या चालकाला मिळणार आहे. शहरात कोरोनाचा प्रादुर्भाव वाढत असून या आजाराने मृत्यूमुखी पडणाऱ्या रुग्णांची संख्या वाढत आहे. कोरोना मृत्यांचे शव कुटुंबीयांना न देता. पालिकेतर्फेच त्यांचे अंत्यसंस्कार केले जातात. मृत व्यक्तीला शववाहिका मिळावी यासाठी हेल्पलाइन सुरू केली, पण त्यावर फोन लागण्यास अडचणी येत आहेत. मृतांची संख्या वाढत असताना हेल्पलाइन उपयोगी ठरत नसल्याने नातेवाईक, रुग्णालयातील कर्मचारी यांना त्रास सहन करावा लागत आहे. मनस्ताप कमी करण्यासाठी ॲप तयार केले आहे.

शवाहिकेसाठी सुरू केलेल्या क्रमांकावर फोन करून रुग्णालयातील कर्मचाऱ्याने किंवा नातेवाईकाने डेथ पास क्रमांक सांगितल्यानंतर पालिकेने नेमलेली व्यक्ती हा क्रमांक ॲपमध्ये टाकेल. त्यावेळी मृताची सर्व माहिती आॅनलाइन उपलब्ध होईल. त्याच बरोबर रुग्णालयाच्या जवळच्या भागात असलेल्या शववाहिकेचा क्रमांक, चालकाचे नाव त्याचा मोबाईल क्रमांक मिळेल. ही शववाहिका बुक झाल्यानंतर लगेच अंत्यसंस्कार करायचे आहे ही माहिती एसएमएसद्वारे नातेवाईक, चालक आणि रुग्णालय प्रशासनाला जाईल.

‘‘शहरात रोज किमान १५० जणांचा कोरोनाने मृत्यू होत आहे. त्याचा ताण निर्माण होत असल्याने हे ॲप तयार केले आहे. या ॲपमुळे नातेवाइकांना शववाहिका व स्मशानभूमी यासाठी धावाधाव करावी लागणार नाही. स्मशानभूमीतील वेटिंग कमी होईल.’’

- श्रीनिवास कंदुल, मुख्य अभियंता, विद्युत विभाग

‘‘कोविडने मृत्यू झालेल्या व्यक्तीवर अंतिम संस्कार होईपर्यंत त्याच्या नातेवाइकांना अनेक त्रासाला सामोरे जावे लागते. हा त्रास कमी करण्यासाठी हे नवीन ॲप नक्कीच महत्त्वपूर्ण ठरेल.

- गणेश बिडकर, सभागृह नेता