दौंड रेल्वे स्थानकाचा पुणे विभागात समावेश करावा; खासदार सुप्रिया सुळे

दौंड - दौंड रेल्वे स्थानकाचा (Daund Railway Station) सोलापूर ऐवजी पुणे विभागात (Pune Division) समाविष्ठ (Included) करण्याची मागणी खासदार सुप्रिया सुळे (MP Supriya Sule) यांनी केली आहे. सध्या या स्थानकावर सोलापूर व पुणे विभागाचे दुहेरी नियंत्रण आहे.

खासदार सुप्रिया सुळे यांनी मध्य रेल्वेचे महाव्यवस्थापक अनिलकुमार लाहोटी यांची भेट घेत मतदारसंघातील रेल्वेसंबंधी प्रलंबित विषयांवर चर्चा केली. दौंड - पुणे लोहमार्गावर पाटस (ता. दौंड) स्थानकाच्या आधी मध्य रेल्वेच्या पुणे विभागाची सुरू होते मात्र दौंड स्थानकाचा सोलापूर विभागात समावेश आहे. दौंड - सोलापूर - वाडी आणि दौंड - नगर - येवला ( जि . नाशिक ) पर्यंतच्या मार्गांचा सोलापूर विभागात समावेश आहे.

दौंड वरून जाणाऱ्या पुणे - दौंड - बारामती रेल्वे खंडाचा पुणे विभागात समावेश आहे. दौंडपासून सोलापूर रेल्वेस्थानकाचे अंतर १८७ किलोमीटर तर पुण्याचे अंतर अवघे ७५ किलोमीटर आहे. प्रशासकीय, भौगोलिक, आर्थिकदृष्ट्या प्रवासी आणि नागरिकांना सोलापूर पेक्षा पुणे विभाग सोईचा असल्याने प्रशासनाने दौंडचा समावेश पुणे विभागात करण्याची मागणी करण्यात आली.

दौंड मध्ये रखडलेल्या तिसर्या भुयारी मार्गाचे (कुरकुंभ मोरी) तातडीने पूर्ण करणे, दौंड मध्ये केंद्रीय विद्यालयासाठी जागा उपलब्ध करून देणे, पुणे - दौंड विभागास उप नगरीय रेल्वेचा दर्जा देणे, इलेक्ट्रिक लोको शेडचे ठप्प झालेले काम पूर्ववत करणे आणि रेल्वेच्या पडीक जागांमध्ये उद्याने तयार करण्याची मागणी करण्यात आली. राष्ट्रवादीचे तालुकाध्यक्ष अप्पासाहेब पवार व रेल्वे सल्लागार समिती सदस्य प्रवीण शिंदे या वेळी उपस्थित होते.