वाघोलीतील लॉकडाउनबाबत घेतलाय हा निर्णय 

वाघोली (पुणे) : वाघोली प्रतिबंधित क्षेत्र असल्याने 17 मेपर्यंत रुग्णालये, मेडिकल व डेअरी वगळता काहीही सुरू होणार नाही. त्यामुळे व्यापाऱ्यांनी घाई करू नये व नागरिकांनी घर बाहेर पडू नये. असे वाघोली ग्रामपंचायत व लोणीकंद पोलिसांनी स्पष्ट केले. 

पूर्व हवेलीतील या सात गावांतील व्यवहारांबाबत हा घेतलाय निर्णय  

राज्य सरकारने रविवारी रात्री लॉकडाउनमध्ये काही प्रमाणात शिथिलता दिली आहे. वाघोली कोरोनामुक्त झाल्याने सरकारचे आदेश येताच व्यापाऱ्यांनी आजपासून दुकाने उघडली जाणार की काय, याबाबत चौकशी सुरू केली. कोणाकडूनच काही स्पष्टता नसल्याने गोंधळाचे वातावरण होते. शनिवारी ग्रामपंचायत सदस्य संदीप सातव, समीर भाडळे व काही सदस्यांनी उद्यापासून वाघोलीत काहीही सुरू होणार नाही, असे मेसेज सोशल मीडियावर टाकले होते. मात्र, तरीही व्यापाऱ्यांची चौकशी सुरू होती. सकाळी तर वाइन शॉपसमोर गर्दी झाली होती. सामाजिक अंतराचा पूर्ण फज्जा उडाला. गर्दीला हटविण्यासाठी पोलिसांना पावले उचलावी लागली. 
याबाबत हवेलीचे गट विकास अधिकारी प्रशांत शिर्के म्हणाले, वाघोली प्रतिबंधित क्षेत्र आहे. त्यामुळे तेथे शिथिलता मिळणार नाही. वाइन शॉप बंद ठेवण्याबाबत हवेली उपविभागीय पोलिस अधिकारी डॉ. सई भोरे पाटील यांच्याशी बोलणे झाले आहे. 

दरम्यान, लॉकडाउन पूर्वीप्रमाणेच 17 मेपर्यंत सुरू राहील. असे ग्रामपंचायतीने आज स्पष्ट केले. वाघोली कोरोनामुक्त झाले असले, तरी कोरोनाविरोधात अजून लढाई सुरूच आहे, असेही स्पष्ट करण्यात आले आहे. परराज्यात जाणाऱ्या नागरिकांसाठी वाघोलीतील भारतीय जैन संघटना शैक्षणिक संकुलात फिटनेस सर्टिफिकीटसाठी तपासणीची व्यवस्था करण्यात आल्याची माहिती प्राथमिक आरोग्य केंद्राच्या वैद्यकीय अधिकारी डॉ. वर्ष गायकवाड यांनी दिली. 

पुण्याच्या इतर बातम्या वाचण्यासाठी येथे क्लिक करा 

वाघोली कोरोनामुक्त झाले असले, तरी धोका टळलेला नाही. लढाई अद्याप सुरूच आहे. वाघोली अद्याप प्रतिबंधित क्षेत्र आहे. त्यामुळे 17 मेपर्यंत रुग्णालये, मेडिकल व डेअरी वगळता काहीही सुरू होणार नाही. किराणा दुकानदारही केवळ घर पोहच सेवा देतील. अन्य दुकाने उघडल्यास गुन्हे दाखल केले जातील. 
- महादेव चव्हाण, 
ग्रामविकास अधिकारी, वाघोली 

वाघोलीत पूर्वी प्रमाणेच लॉकडाउनची काटेकोर अंमलबजावणी होईल. नागरिकांनी बाहेर पडू नये. दारूची दुकानेही बंद राहणार आहेत. कायद्याचे उल्लंघन करणाऱ्यांवर गुन्हा दाखल करण्यात येईल. 
- प्रताप मानकर, 
पोलिस निरीक्षक, लोणीकंद पोलिस ठाणे