मराठा आरक्षणावरून शासनाचाच 'गोंधळात गोंधळ'; सुधारित आदेश काढल्याने विद्यार्थ्यांना मिळाला दिलासा

Maratha_Reservation
Maratha_Reservation

पुणे : मराठा आरक्षणाला सर्वोच्च न्यायालयाने स्थगिती दिलेली असताना आपल्या करियरचे काय होणार? असा प्रश्‍न लाखो विद्यार्थ्यांना पडलेला आहे. असे असतानाच उच्च व तंत्र शिक्षण विभागाचा अभूतपूर्व गोंधळ समोर आला. शुक्रवारी (ता. 11) तातडीचे परिपत्रक काढून मराठा आरक्षणानुसार पदवी प्रथम वर्षाचे सर्व प्रवेश रद्द केल्याचे आदेश काढले. मात्र, चूक लक्षात येताच, शनिवारी (ता.12) सुधारित आदेश काढत हे परिपत्रक रद्द केले. त्यामुळे विद्यार्थ्यांना दिलासा मिळाला आहे.

सर्वोच्च न्यायालयाने मराठा आरक्षणाला स्थगिती देऊन ते खंडपीठाकडे पुढील सुनावणीसाठी पाठविले आहे. राज्य सरकारने याबाबत पुढे काय करायचे याबाबत अद्याप भूमिका स्पष्ट केलेली नाही. त्यामुळे इयत्ता 11वी पासून ते उच्च शिक्षणाच्या स्तरावर संभ्रम निर्माण झालेला आहे.
दरम्यान, न्याय व विधी विभागाने सर्वोच्च न्यायालयाच्या आदेशासंदर्भात दिलेल्या अभिप्रायावरून उच्च व तंत्र शिक्षण विभागाने तातडीचे परिपत्रक काढले.

त्यामध्ये ज्या महाविद्यालयांनी किंवा शिक्षण संस्थांनी 2020-21 या शैक्षणिक वर्षात पदवीच्या प्रथम वर्षाला प्रवेश दिले आहेत, त्यांनी ही सर्व प्रक्रिया मागे घ्यावी, या वर्षासाठी 'एसईबीसी' हे आरक्षण लागू होणार नाही. हे आरक्षण वगळून प्रवेश प्रक्रिया राबविता येईल, असे आदेश दिले होते. या आदेशामुळे पदवीचे झालेले प्रवेश रद्द होणार असल्याने मोठा गोंधळ निर्माण झाला. त्यामुळे शनिवारी उच्च व तंत्र शिक्षण विभागाने पुन्हा एक परिपत्रक काढून प्रवेशासंबंधी 11 सप्टेंबर रोजी काढलेले परिपत्रक रद्द केले आहे, शासनाच्या आदेशानुसार पुढील कार्यवाही केली जाईल असे स्पष्ट केले.

"महाविद्यालयांमध्ये पदवी प्रथम वर्षाचे प्रवेश शेवटच्या टप्प्यात आलेले असताना प्रवेश रद्द केल्याचे परिपत्रक काढल्याने यंत्रणेला, विद्यार्थ्यांना त्रास झाला. मात्र, उशिरा का होईना चूक सुधारत हे परिपत्रक रद्द केल्याबद्दल शासनाचे धन्यवाद. अशा विषयांमध्ये अभ्यास करून परिपत्रक काढल्यास असे गोंधळ टाळता येतील.
- ऍड. एस. के. जैन, अध्यक्ष, नियामक मंडळ, शि.प्र. मंडळी.

- पुण्याच्या बातम्या वाचण्यासाठी येथे ► क्लिक करा

(Edited by : Ashish N. Kadam)

Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Related Stories

No stories found.
Esakal Marathi News
www.esakal.com