''जय शिवाजी, जय भवानी!''; मराठा संघर्ष यात्रेचे पुण्यातून प्रस्थान

पुणे : जय शिवाजी जय भवानी.... छत्रपती शिवाजी महाराज की जय... एक मराठा लाख मराठा...चा जयघोष करीत मराठा क्रांती मोर्चाच्या मराठा संघर्ष यात्रेचे पुण्यातून साष्टपिंपळगावकडे प्रस्थान झाले. 

मराठा क्रांती मोर्चा, पुणे जिल्ह्याच्या वतीने गुरुवारी दुपारी साडेबाराच्या सुमारास या यात्रेस प्रारंभ झाला. कोथरूड येथील छत्रपती शिवाजी महाराजांच्या पुतळ्याला पुष्पहार अर्पण करून संघर्ष यात्रा रवाना झाली. मराठा क्रांती मोर्चाचे समन्वयक राजेंद्र कुंजीर, रघुनाथ चित्रे पाटील, हनुमंत मोटे, किशोर मोरे, मीना जाधव, श्रुतिका पाडळे, जितेंद्र कोंढरे, सारिका कोकाटे, विनोद साबळे, अंकुश कदम, नाना निवंगुणे, अनिल ताडगे, जगजीवन काळे यांसह मराठा क्रांती मोर्चाचे समन्वयक या वेळी उपस्थित होते. ही यात्रा शुक्रवारी (ता. ५) सकाळी दहा वाजता बीड येथून पुन्हा निघेल. तेथून बीड ते पाडळसिंगी, गेवराई, शहागडमार्गे जालना जिल्ह्यातील साष्ट पिंपळगाव येथील आंदोलनाला पाठिंबा दिला जाणार आहे. 

- ताज्या बातम्यांसाठी डाऊनलोड करा ई-सकाळचे ऍप

- पुण्याच्या बातम्या वाचण्यासाठी येथे ► क्लिक करा 
कुंजीर म्हणाले, ''पुणे शहर, जिल्ह्यातून तसेच रायगड, मुंबई येथून ४२ वाहनांतून ही यात्रा साष्टपिंपळगावकडे मार्गस्थ झाली आहे. जनजागृती करण्यासाठी सर्वात पुढे रथ असणार आहे. येरवडा, वाघोली, सुपा, नगर, अंमळनेरमार्गे बीडला पोचतील. ठिकठिकाणी या मोर्चाचे स्वागत झाले आहे. पोलिस प्रशासनाला मोर्चाच्या परवानगीसाठी पत्रव्यवहार केला असून, शिस्तबध्द पद्धतीने हा मोर्चा आंदोलनाकडे मार्गस्थ झाला आहे.''

चित्रे पाटील म्हणाले, ''मराठा आरक्षणाबाबत सरकार वेळकाढूपणा काढत आहे. साष्ठ पिंपळगावातील मराठा बांधवांनी आरक्षणासाठी सुरू केलेल्या ठिया आंदोलनाला पाठिंबा देत लढ्याला बळकटी देण्यासाठी या संघर्ष यात्रेचे आयोजन केले आहे. त्याठिकाणी मराठवाड्यातील मराठा समाज बांधव उपस्थित राहणार आहेत. त्याठिकाणी आंदोलनाची भूमिका ठरविण्यात येणार आहे.''

असा करा राष्ट्रीय जेईई मेन्सचा अभ्यास