शिरोली बुद्रुक येथे धर्मनाथ बीजोत्सव उत्साहात

ओझर, ता. १९ ः शिरोली बुद्रुक (ता. जुन्नर) येथे घरोघरी धर्मनाथ बीजोत्सव उत्साहात साजरा करण्यात आला. या दिवसाला नाथ सांप्रदयात अनन्य साधारण महत्त्व आहे, याच दिवशी गोरक्षनाथांनी धर्मनाथास अनुग्रह देऊन दीक्षा दिली होती. त्यावेळी सर्व देवही धर्मनाथांना आशीर्वाद देण्यास उपस्थित होते.
हिंदू धर्म संस्कृतीनुसार त्या दिवसापासून माघ शुद्ध द्वितीयेला धर्मनाथ बीजोत्सव साजरा केला जातो. महाराष्ट्रातील ज्या गावांमध्ये धर्मनाथ मंदिर आहे, त्या गावात धर्मनाथ बिजेच्या तिथीच्या दिवशी व ज्या गावांमध्ये मंदिर नाही त्या गावात धर्मनाथ बिजेच्या आदल्या दिवशी धर्मनाथ बीज साजरी केली जाते. हा सण शेतकरी वर्गात मोठ्या आनंदाने उत्साहात साजरा होतो. या सणासाठी घरोघरी गव्हाच्या पिठाचा ठम बनवला जातो व त्यामध्ये तुपाचा दिवा लावतात. नैवेद्य म्हणून ज्वारीच्या पिठाची आंबील, गव्हाच्या पिठाचा काला व घेवड्याची, वांग्याची, मेथीची भाजी, हरभऱ्याच्या घुगऱ्या, वडे, वांगी इत्यादी अन्नपदार्थांचा नैवेद्य अर्पण केला जातो.
संध्याकाळच्या सुमारास स्वतःचे पितृछत्र हरपलेली पुरुष मंडळी घरोघरी जाऊन दीप प्रज्वलित करतात. त्यावेळी पाचाचे वचन, गुरूचे शब्द, दीपक पजळजी या ओव्यांचा पाच वेळा नामघोष करून दीप प्रज्वलित करतात. त्यानंतर धर्मरायाची फुर्रर्रर्र...मोळचा जयघोष केला जातो. त्यानंतर सर्वांना प्रसाद म्हणून हरभऱ्याच्या घुगऱ्या, आंबील गूळ-तूप, भाकरी, चपातीचा काला दिला जातो. गावोगावी आजही हा सण मोठ्या आनंदाने, उत्साहाने साजरा केला जातो.