पुणे : मगरपट्टा सिटीचे संचालक आबासाहेब मगर यांचे निधन

मांजरी : मगरपट्टा सीटीचे संचालक व प्रगतशील शेतकरी आबासाहेब ऊर्फ दत्तात्रेय धोंडो मगर (वय ९१) यांचे वृद्धापकाळाने निधन झाले. त्यांच्या पश्चात तीन मुले, दोन मुली, दोन पुतणे, पुतणी,  सुना, नातवंडे असा परिवार आहे.

माजी खासदार (कै.) आण्णासाहेब मगर यांच्या निधनानंतर आबासाहेब यांनी त्यांचा सामाजिक, सहकार, शैक्षणिक व राजकीय वारसा समर्थपणे सांभाळला. त्यांनी शिवाजी मराठा शिक्षण संस्थेचे उपाध्यक्ष तर थेऊर येथील यशवंत सहकारी साखर कारखान्यावर संचालक म्हणून काम पाहिले आहे. सध्याच्या मगरपट्टा सिटीच्या परिसरात त्यांनी ऊस शेतीबरोबर पोल्ट्री उद्योगही सांभाळला. स्वत: स्थापत्य अभियंता असल्याने त्यांनी काही काळ बांधकाम व्यवसायीक म्हणूनही काम केले.

आशिया खंडातील पहिले स्वतंत्र शहर म्हणून उभारल्या गेलेल्या मगरपट्टा सिटीच्या उभारणीत त्यांचे महत्वपूर्ण मार्गदर्शन राहिले. सिटीचे व्यवस्थापकीय संचालक व क्रेडाईचे राष्ट्रीय अध्यक्ष सतीश मगर हे त्यांचे पूत्र होत.