पुणे जिल्ह्यात कोरोना तपासणी अहवालासाठी मजुरांकडे लाच मागणाऱ्या डाॅक्टरला अटक

पुणे जिल्ह्यात कोरोना तपासणी अहवालासाठी मजुरांकडे लाच मागणाऱ्या डाॅक्टरला अटक

दौंड : दौंड शहरातील उप जिल्हा रूग्णालयात रोजंदारीवरील मजुरांकडे कोरोना विषाणू तपासणी अहवाल देण्याकरिता प्रत्येकी शंभर रूपये मागून दीड हजार रूपयांची लाच घेणाऱ्या डॅाक्टर मिलिंद कांबळे याच्यावर कारवाई करण्यात आली आहे.

दौंड तालुक्यातील कुरकुंभ एमआयडीसी मधील एका कंपनीतील कंत्राटदाराने १९ रोजंदारीवरील मजुरांना कोरोना तपासणी करण्यासाठी २६ फेब्रुवारी रोजी दौंड शहरातील उपजिल्हा रुग्णालयात आणले होते. रॅपिड अँटिजेन डिटेक्शन किटद्वारे तपासणी करण्यात आली.

सदर तपासणीचा अहवाल अवघ्या अर्धा तासात प्राप्त होतो. परंतु वैद्यकीय अधिकारी डॅा. मिलिंद दामोदर कांबळे (वय ३८, रा. कात्रज, पुणे) याने तपासणीचा अहवाल देण्याकरिता प्रत्येकी शंभर रूपये प्रमाणे एकूण एकोणीसशे रूपयांची मागणी केली होती.

दरम्यान, या मजुरांच्या पर्यवेक्षकाने पुणे येथील लाचलुचपत प्रतिबंधक विभागाकडे तक्रार केली. तक्रारीनुसार सापळा रचल्यानंतर डॅा. मिलिंद कांबळे याने एकोणीसशे रूपयांएेवजी तडजोडीनंतर दीड हजार रूपयांची मागणी केली. १ मार्च रोजी उप जिल्हा रूग्णालयात डाॅ. कांबळे यास सदर लाच स्वीकारताना पकडण्यात आले.

डाॅ. मिलिंद कांबळे हा उप जिल्हा रूग्णालयात राष्ट्रीय बाल स्वास्थ्य कार्यक्रम अंतर्गत कंत्राटी पध्दतीने वैद्यकीय अधिकारी म्हणून कार्यरत आहे.

सर्व १९ मजुरांचा तपासणी अहवाल निगेटिव्ह आला आहे. दौंड पोलिस ठाण्यात या प्रकरणी गुन्हा दाखल करण्यात आला आहे. लाच प्रकरणात अन्य काही वैद्यकीय अधिकारी व कर्मचारी यांच्या सहभागाची पडताळणी केली जात आहे. 

तालुक्यात १०५ सक्रिय रूग्ण- दौंड तालुक्यात २९ एप्रिल २०२० पासून २८ फेब्रुवारी २०२१ पर्यंत ३४८६ जणांना कोरोनाची बाधा होऊन त्यापैकी ३३०९ जण उपचारानंतर बरे झाले आहेत. तर ८१ नागरिकांचा मृत्यू झाला आहे. तालुक्यात सध्या १०५ बाधितांवर उपचार सुरू आहेत.

(संपादन : सागर डी. शेलार)

Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Related Stories

No stories found.
Marathi News Esakal
www.esakal.com