Pune Transport : पुणे विद्यापीठ ते सिमला चौकदरम्यान दुहेरी वाहतूक सुरू

पुणे - गणेशखिंड रस्त्यावरील सावित्रीबाई फुले पुणे विद्यापीठ चौक ते सिमला ऑफीस चौकदरम्यान गुरुवारपासून (ता. २०) सर्व वाहनांसाठी दुहेरी वाहतूक सुरू करण्यात आली. शहर वाहतूक शाखेकडून आज याबाबत निर्णय घेण्यात आला. त्यामुळे वाहनचालकांना मोठा दिलासा मिळाला आहे.

गणेशखिंड रस्त्यावर टाटा मेट्रोकडून पुलाचे बांधकाम सुरू आहे. त्यामुळे वाहतूक कोंडी टाळण्यासाठी आणि वाहनचालकांच्या सुरक्षिततेच्या दृष्टीने मागील २६ नोव्हेंबरपासून वाहतूक वळविण्यात आली होती. ही वाहतूक एबिल कॉर्नर- सिंफनी सर्कल ते न.ता.वाडी मार्गे सुरू होती. त्यामुळे वाहनचालकांना लांब वळसा घालून जावे लागत होते.

आता पुणे विद्यापीठासमोरील आचार्य आनंदऋषिजी महाराज चौकापासून सिमला ऑफीस चौकापर्यंत दुहेरी वाहतूक सुरू करण्यात आली आहे. शहर वाहतूक शाखेचे पोलिस उपायुक्त अमोल झेंडे यांनी याबाबतचा आदेश गुरुवारी काढला. दुहेरी वाहतूक सुरू झाल्यामुळे वाहनचालकांना वाहतूक कोंडी कमी होण्याची अपेक्षा असून, प्रवासातील वेळेची बचत होणार आहे.