MDला अॅडमिशन देतो म्हणत डॉक्‍टरला घातला ३० लाखांना गंडा

पुणे : वैद्यकीय क्षेत्रातील पदव्युत्तर शिक्षणासाठी (एमडी) प्रवेश मिळवून देतो, अशी बतावणी करून दोघांनी हडपसर येथील एका डॉक्‍टर तरुणाला 30 लाख 10 हजारांचा ऑनलाइन गंडा घातला आहे. या प्रकरणी हडपसर पोलिस ठाण्यात फसवणुकीचा गुन्हा दाखल करण्यात आला आहे.

- पुण्यात गुन्हेगारांची झाडाझडती; 'कोम्बिंग ऑपरेशन'द्वारे ५५ जणांना अटक

या बाबत सौरभ लांबतुरे (वय 26, रा. हडपसर) यांनी तक्रार दिली आहे. त्यानुसार संतोषकुमार आणि शामा सर ऊर्फ बाबूभाई यांच्यावर गुन्हा दाखल करण्यात आला आहे. पोलिसांनी दिलेल्या माहितीनुसार, तक्रारदार तरुणाने एमबीबीएसचे शिक्षण घेतले आहे. त्यानंतर पदव्युत्तर शिक्षण घ्यायचे होते. त्यासाठी त्यांनी एका वेबसाइटवर अर्ज केला होता. अर्ज केल्यानंतर काही दिवसांनी एकाने सौरभ यांना फोन करून एमडीला प्रवेश मिळवून देण्याची बतावणी केली. त्यानुसार डॉक्‍टर आणि संबंधित फोन करणाऱ्या व्यक्तीचे बोलणे सुरू झाले.

- Farmers Protest: अंबानींच्या ऑफिसवर मोर्चा काढणार; राजू शेट्टींनी फुंकलं रणशिंग​

विविध फी आणि प्रोसेसिंगच्या नावाखाली संतोषकुमार आणि त्याचा साथीदार शामा यांनी संबंधित डॉक्‍टरकडून ऑनलाईनरित्या टप्प्याटप्प्याने 30 लाख 10 हजार रुपये बॅंकखात्यावर जमा करून घेतले. त्यानंतर फोन बंद केला. रक्कम जमा करूनही त्यांना एमडीच्या शिक्षणासाठी प्रवेश मिळाला नाही. तसेच, आरोपींनी त्यांचे पैसे न देता फसवणूक केल्याचे लक्षात आल्यानंतर त्यांनी हडपसर पोलिसांकडे तक्रार दिली होती. त्यानुसार तपास करून गुन्हा दाखल करण्यात आला आहे. याप्रकरणी पोलिस उपनिरीक्षक आर. आर. पाटील अधिक तपास करत आहेत.

- पुण्याच्या बातम्या वाचण्यासाठी येथे क्लिक करा

(Edited by: Ashish N. Kadam)