आरटीई २५ टक्के राखीव जागांवरील प्रवेशासाठी १० मे पर्यंत मुदतवाढ

पुणे : शिक्षण हक्क कायद्यानुसार (आरटीई) खासगी शाळांमधील २५ टक्के राखीव जागांवरील प्रवेशासाठी आता १० मे २०२२ पर्यंत मुदतवाढ देण्यात आली आहे. त्यामुळे निवड यादीतील बालकांच्या प्रवेशासाठी पालकांनी पडताळणी समितीकडे जाऊन प्रवेश घेण्यासाठी आणखी कालावधी मिळाला आहे. या प्रवेश प्रक्रियेअंतर्गत आतापर्यत ५७ हजार ९९ प्रवेश निश्चित झाले आहेत. आर्थिकदृष्ट्या दुर्बल आणि वंचित घटकातील विद्यार्थ्यांच्या खासगी शाळांमधील २५ टक्के राखीव जागांवरील प्रवेशाची प्रक्रिया दरवर्षीप्रमाणे राज्यात ऑनलाइन पद्धतीने राबविण्यात येत आहे. त्यानुसार २०२२-२३ या शैक्षणिक वर्षासाठी ऑनलाइन सोडत (लॉटरी) ३० मार्च रोजी काढण्यात आली.

या सोडतीनुसार प्रवेशाच्या पोर्टलवर निवड यादी आणि प्रतीक्षा यादी ४ एप्रिल रोजी घोषित केली. त्यात ९० हजार ६८८ विद्यार्थ्यांची निवड यादी तसेच ६९ हजार ८५९ विद्यार्थ्यांची प्रतीक्षा यादी जाहीर करण्यात आली. तसेच या प्रवेश प्रक्रियेत दोनशे दिव्यांग विद्यार्थ्यांची निवड झाली आहे. निवड आणि प्रतीक्षा यादीतील बालकांच्या पालकांना एसएमएस पाठविण्यात आले आहेत. निवड यादीतील बालकांच्या प्रवेशासाठी सुरवातीला २० एप्रिलपर्यत मुदत देण्यात आली होती, त्यानंतर २९ एप्रिलपर्यत मुदतवाढ देण्यात आली होती. आता या प्रवेश प्रक्रियेअंतर्गत निवड यादीतील विद्यार्थ्यांना प्रवेश घेण्यासाठी मुदतवाढ दिली आहे. निवड यादीतील विद्यार्थ्यांच्या प्रवेशासाठी ही अंतिम मुदतवाढ असणार आहे, अशी माहिती राज्याचे प्राथमिक शिक्षण संचालक दिनकर टेमकर यांनी दिली.

आतापर्यत झालेल्या प्रवेशाचा आढावा :

जिल्हा : आरटीई शाळा : प्रवेशासाठी उपलब्ध जागा : आलेले अर्ज : निवड झालेल्या विद्यार्थ्यांची संख्या : निश्चित झालेले प्रवेश

औरंगाबाद : ५७५ : ४,३०१ : १७,२२१ : ४,१९३ : २,३९५

नागपूर : ६६३ : ६,१८६ : ३१,४११ : ६,१०६ : ३,९१८

नाशिक : ४२२ : ४,९२७ : १६,५६७ : ४,५१३ : २,९६५

पुणे : ९५७ : १५,१२६ : ६२,९६० : १४,९५८ : ९,७२८

रायगड : २६५ : ४,४६३ : ८,७७८ : ३,८१३ : २,१२७

ठाणे : ६४८ : १२,२६७ : २५,४१९ : १०,४२९ : ६,३५८