पुणे : शेतकरी मारहाण प्रकरण; सराईतासह दोघांवर गुन्हा दाखल

पुणे : कृषी उत्पन्न बाजार समितीच्या श्री छत्रपती शिवाजी महाराज मार्केट यार्डातील बाजार आवारात एका शेतकऱ्याला मंगळवारी मारहाण करण्यात आल्याचा प्रकार उघडकीस आला होता. या प्रकरणी सराईत गुन्हेगारासह दोघांविरुद्ध मार्केटयार्ड पोलिस ठाण्यात गुन्हा दाखल केला आहे.

ताज्या बातम्यांसाठी करा ई-सकाळचे ऍप 

भानुदास वसंत देशमुख (वय 42, रा. ता. अकोले, अहमदनगर) यांनी दिलेल्या तक्रारीनुसार सराईत गुन्हेगार राहुल लक्ष्मण बनसोडे (रा. मार्केटयार्ड) आणि त्याच्या एका साथीदाराविरुद्ध मारहाणीचा गुन्हा दाखल करण्यात आला आहे.

पोलिसांनी दिलेल्या माहितीनुसार, देशमुख हे अहमदनगरमधून लसूण विक्रीसाठी घेऊन आले होते. हा लसूण एका व्यापा-याकडे विक्रीसाठी दिला होता. त्याची पट्टी येणे बाकी असल्याने ते मार्केट यार्डमध्ये थांबले होते. त्यानंतर ते कांदा, बटाटा, लसूण विभागात गाळा नंबर 602 समोर पाणी पिण्यासाठी बाटली घेऊन गेले होते.

बाटलीतून पाणी पीत असताना बनसोडे याने विनाकारण फिर्यादी याच्या पाण्याच्या बाटलीवर फटका मारला. यामुळे फिर्यादीच्या तोंडावर आणि अंगावर पाणी सांडले. फिर्यादीने याचा जाब विचारला असता, बनसोडे व त्याच्या साथीदाराने हाताने तसेच भाजीच्या प्लास्टिकच्या कंटेनरने हातावर आणि तोंडावर मारहाण केली.

मारहाणीत फिर्यादी यांच्या तोंड, दात, डोळे तसेच डोक्‍याला दुखापत झाली. या प्रकरणाचा तपास सहायक पोलिस निरीक्षक खटके करीत आहेत.