Belhe News : शेतकरी कुटुंबातील रवीना डुकरे हीची पोलिस उपनिरीक्षक पदाला गवसणी

बेल्हे - पारगाव तर्फे आळे (ता. जुन्नर) येथील शेतकरी कुटुंबातील 'रवीना बाळासाहेब डुकरे' हिने, नुकतीच महाराष्ट्र लोकसेवा आयोगाच्या स्पर्धा परीक्षेच्या माध्यमातून पोलिस उपनिरीक्षक पदाला गवसणी घातली आहे. दरम्यान येथील महात्मा गांधी विद्यालयात ग्रामस्थांच्या वतीने तिचा निवडीबद्दल जाहीर सत्कार करण्यात आला.

पारगाव तर्फे आळे येथे पोलिस उपनिरीक्षक पदाला गवसणी घालत गावच्या शिरपेचात मानाचा तुरा रोवल्याबद्दल, ग्रामस्थांच्या वतीने रविना डुकरे हीची गावातून सवाद्य मिरवणूक काढण्यात आली. येथील महात्मा गांधी विद्यालयात रविना डुकरे हिने दहावीपर्यंत शिक्षण पूर्ण करून, शिरूरच्या विद्याधाम प्रशालेत अकरावी व बारावीचे शिक्षण घेतले.

तसेच त्यांच्या कुटुंबामध्ये बैलगाड्यांच्या शर्यतीचा वारसा आहे. येथील महात्मा गांधी विद्यालयात आयोजित कार्यक्रमप्रसंगी शिरूरच्या विद्याधाम प्रशालेचे प्राचार्य वसंत सुकाळे, उद्योजक संभाजी चव्हाण, देवराम तट्टू, पारगावचे उपसरपंच रामचंद्र डुकरे, गोपाल कृष्ण पतसंस्थेचे अध्यक्ष प्रकाश चव्हाण, विकास सोसायटीचे अध्यक्ष प्रशांत तट्टू, बेल्हे येथील साईकृपा पतसंस्थेचे अध्यक्ष सदाशिव बोरचटे, उपाध्यक्ष सावकार पिंगट, सामाजिक कार्यकर्ते जानकु डावखर, मंगरूळ गावचे सामाजिक कार्यकर्ते निलेश लामखडे, पिंपरखेड गावचे दयानंद ढोमे त्याचप्रमाणे शाळेतील सर्व शिक्षक, विद्यार्थी आदींची उपस्थिती होती.

दरम्यान यावेळी विद्यालयातील इयत्ता आठवी मध्ये शिकत असणाऱ्या वेदिका कैलास डुकरे व वेदांती येवले या दोन विद्यार्थिनी एन. एम. एम. एस. परीक्षेमध्ये शिष्यवृत्तीस पात्र ठरल्याबद्दल ग्रामस्थांच्या वतीने त्यांनाही सन्मानित करण्यात आले.

दरम्यान यापूर्वीच्या काळात याच गावचे सारंग चव्हाण यांची पोलिस उपनिरीक्षक पदी निवड झालेली असून, ते सध्या पोलिस दलात सहाय्यक पोलिस निरीक्षक म्हणून कार्यरत आहेत.