जेवणाचे बिल मागितल्याच्या रागातुन हॉटेल कामगाराचे अपहरण; पाच जणांना अटक

पुणे - हॉटेलमध्ये जेवण केल्यानंर बिल मागितल्याच्या रागातुन टोळक्‍याने हॉटेलच्या कामगारास जबर मारहाण करुन त्याचे अपहरण केले. या घटनेची माहिती मिळताच भारती विद्यापीठ पोलिसांनी आरोपींचा माग काढत पाच जणांना अटक केली. हि घटना मुंबई-बंगळुरू बाह्यवळण मार्गावर मंगळवारी रात्री घडली.

योगेश सर्जेरावर पार (वय 28, रा. नगर), रवींद्र सखाहरी कानडे (वय 41), रुपेश अशोक वाडेकर (वय 38), ओंकार जालिंदर बेंद्रे (वय 32), नितीन अशोक वाडेकर (वय 32, रा.रासदर, नगर) अशी अटक केलेल्यांची नावे आहेत. किशोर कोईराला असे जखमी झालेल्या कामगाराचे नाव आहे. याप्रकरणी शारदा निलेश भिलारे (वय 38, रा. भिलारेवाडी, कात्रज) यांनी भारती विद्यापीठ पोलिस ठाण्यात फिर्याद दिली आहे.

पोलिसांनी दिलेल्या माहितीनुसार, फिर्यादी भिलारे यांचे मुंबई-बंगळुरू बाह्यवळण मार्गावर नवीन कात्रज बोगद्याजवळ रानमळा नावाचे हॉटेल आहे. मंगळवारी रात्री त्यांच्या हॉटेलमधये पार, कानडे, वाडेकर, बेंद्रे हे जेवण करण्यासाठी आले होते. त्यांनी जेवण केल्यानंतर किशोर याने त्यांना जेवणाचे बिल मागितले. त्याचा राग आल्याने आरोपींनी त्यास बेदम मारहाण केली. तसेच फिर्यादी भिलारे यांनी धमकावले. "उद्या तुम्ही याच्या मरणाची खबर ऐकाल' अशी धमकी देत त्यांनी कोईरालाला आपल्या कारमध्ये जबरदस्तीने बसवून त्याचे अपहरण केले. त्यानंतर त्यास आणखी जबर मारहाण करुन काही अंतरावर सोडून देत आरोपी पसार झाले. या घटनेबाबत भिलारे यांनी तत्काळ भारती विद्यापीठ पोलिसांकडे फिर्याद दिली. पोलिसांनी घटनेची गांभीर्याने दखल घेत आरोपींना अटक केली. भारती विद्यापीठ पोलिस या प्रकरणाचा तपास करीत आहेत.