Yerawada : येरवड्यातील बालसुधारगृहातून चार मुले फरार

पुणे - येरवडा येथील बालसुधारगृहात गोंधळाचा फायदा घेत भिंतीला शिडी लावून चार मुलांनी धूम ठोकली. ही घटना १८ एप्रिल रोजी दुपारी घडली. याच बालसुधारगृहातून तीन महिन्यांपूर्वी चार अल्पवयीन मुले पसार झाल्याची घटना घडली होती.

या संदर्भात पंडित जवाहरलाल नेहरु उद्योग केंद्रातील कर्मचारी सुमंत अशोक जाधव (रा. अप्पर इंदिरानगर) यांनी फिर्याद दिली आहे. त्यानुसार येरवडा पोलिस ठाण्यात अल्पवयीन मुलांविरुद्ध गुन्हा दाखल करण्यात आला आहे.

पोलिसांनी दिलेल्या माहितीनुसार, येरवडा येथे पंडित जवाहरलाल नेहरु उद्योग केंद्राचे बालनिरीक्षणगृह आहे. गंभीर गुन्ह्यातील अल्पवयीन मुलांना बालन्याय मंडळाच्या आदेशानुसार या बालसुधारगृहात ठेवण्यात येते. बालसुधारगृहात अल्पवयीन मुलांच्या दोन गटांत किरकोळ कारणावरुन वाद झाले होते. नऊ अल्पवयीन मुलांनी दोन मुलांना मारहाण केली. त्यामुळे बालसुधारगृहाच्या आवारात गोंधळ उडाला. त्याचा फायदा घेत चार अल्पवयीन मुलांनी भिंतीला शिडी लावून धूम ठोकली. या अल्पवयीन मुलांचा शोध घेण्यात येत आहे.