Mazi Shala Sundar Shala : पुणे महापालिका गटामध्ये कात्रजचे विद्यानिकेतन अव्वल

पुणे : राज्य सरकारच्या ‘माझी शाळा, सुंदर शाळा’ अभियानात महापालिका गटामध्ये पुणे महापालिकेच्या कात्रज येथील डॉ. यशवंत गणपत शिंदे विद्यानिकेतन (क्रमांक १९) या शाळेने प्रथम क्रमांक पटकाविला. पिंपरी चिंचवड महापालिकेच्या क्रीडा प्रबोधिनी विद्यालय, उद्यमनगरने द्वितीय क्रमांक मिळविला. या दोन्ही शाळा ‘आदर्श शाळा’ या विशेष प्रकल्पातून पुढे आल्या आहेत.

शिक्षण विभागाकडून हे अभियान राबविले जात आहे. या अंतर्गत विविध गटांमध्ये राज्यभरातील शाळांना बक्षीसे देण्यात आली. डॉ. शिंदे विद्यानिकेतनमध्ये शिष्यवृत्तीसह स्पर्धा परिक्षांची तयारी करून घेतली जाते. खेळ, स्वच्छता व पर्यावरणपूरक उपक्रमांना प्राधान्य दिले जाते. अद्ययावत ग्रंथालय, विनादप्तर शाळा, ई-लर्निंग वर्ग, सर्वाधिक पट अशी शाळेची वैशिष्ट्ये आहेत.

पुणे महापालिकेच्या शाळांमध्ये सुधारणा घडविण्यासाठी ‘आदर्श शाळा’ उपक्रम राबविला आहे. त्यात ‘माझी शाळा, सुंदर शाळा’ अभियानात कात्रजमधील शिंदे विद्यानिकेतन शाळेला प्रथम क्रमांक मिळाल्याचा आनंद वाटला. पिंपरी चिंचवडमध्येही आम्ही हा प्रयोग राबविला होता. तेथील क्रीडा प्रबोधिनीला द्वितीय क्रमांक मिळाल्याने आनंद द्विगुणित झाला.

- विकास ढाकणे, अतिरिक्त आयुक्त, पुणे महापालिका

खासगी शाळा गटात रमणबाग तृतीय

या अभियानातील खासगी शाळांच्या गटामध्ये निगडी येथील ज्ञानप्रबोधिनी नवनगर विद्यालयाने प्रथम क्रमांक, तर शनिवार पेठेतील न्यू इंग्लिश स्कूल रमणबाग या शाळेने तृतीय क्रमांक मिळविला.