Pune News : पुण्यातील तो’ मृत्‍यू ‘जीबीएस’चा नाही; मृत्‍यू संशोधन समितीचा अहवाल

पुणे - नवी पेठेतील एका खासगी रुग्णालयामध्ये उपचार घेत असलेल्या ६० वर्षीय रुग्णाचा ३१ जानेवारीला मृत्यू झाला. त्याला 'गुलियन बॅरी सिंड्रोम' (जीबीएस) असल्याची नोंद याच रुग्णालयाने केली असल्याने महापालिकेनेही त्याची नोंद ‘जीबीएस’चा मृत्यू अशी केली..मात्र, ‘जीबीएस’ ने झालेल्या मृतांच्या उपचारांच्या कागदपत्रांची ‘मृत्यू संशोधन समिती’ (डेथ ऑडिट कमिटी) च्या तज्ज्ञांकडून पडताळणी केली तेव्हा त्याला ‘जीबीएस’ नसल्याचे आढळून आले. तर त्याचा मृत्यू इतर गुंतागुंतीमुळे झाल्याचे निदान या समितीने केले असून आता त्याची नोंद कशी बदलायची, असा प्रश्न महापालिकेच्या आरोग्य विभागाला पडला आहे..हा रुग्ण धायरीतील डीएसके विश्व जवळील एका सोसायटीजवळ राहत होता. त्याला २३ तारखेला जुलाबाचा त्रास झाला. २५ जानेवारीला त्याला दोन्ही पायांमध्ये अशक्तपणा जाणवत होता. त्याला आधी जवळील खासगी रुग्णालयात दाखल केले व नंतर नवी पेठेतील खासगी रुग्णालयात २७ जानेवारीला उपचारासाठी दाखल केले होते. त्यावेळी त्याला बेशुध्दावस्था आणि अर्धांगवायु ही शारीरिक लक्षणे होती. त्याला व्हेंटिलेटरवर घेण्यात आले. तसेच ‘आयव्हीआयजी’ व इतर उपचारही दिले..दरम्यान, उपचार सूरू असताना त्याचा ३१ जानेवारीला ह्रदयविकाराचा धक्का आल्याने मृत्यू झाला. दरम्यान, त्याला जीबीएस सदृश लक्षणे असल्याने रुग्णालयाने त्याला ‘जीबीएस’ असल्याचे निदान केले होते. तर त्याचा ‘बिकरस्टाफ ब्रेनस्टेम इन्सेफेलायटिस’ (मध्यवर्ती मज्जासंस्थेवर हल्ला करणारा दुर्मिळ विकार), जीबीएस दमा व मधुमेह यामुळे मृत्यू झाला असल्याचे कारण खासगी रुग्णालयाने दिले होते..त्यानंतर केंद्र व राज्य शासनाकडून ‘जीबीएस’ बाबत आलेल्या मार्गदर्शक तत्त्वांनुसार या मृत्यूंची पडताळणी करण्यासाठी वेगवेगळ्या विषयांच्या तज्ज्ञांची ‘मृत्यू संशोधन समिती’ची स्थापना केली आहे. आतापर्यंत ‘जीबीएस’ ने पाच जणांचा मृत्यू झाला असून या सर्वांच्या कागदपत्रांची पडताळणी केली असता ३१ जानेवारीला खासगी रुग्णालयात झालेल्या मृताला ‘जीबीएस’ नसल्याचा निष्कर्ष समितीने काढला..‘जीबीएस’ च्या निदानाबाबत संभ्रम‘जीबीएस’ च्या रुग्णांचे निदान करण्यासाठी अशी कोणतीही एक ठराविक चाचणी नाही. त्याचे निदान हे रुग्णांच्या अर्धांगवायुच्या लक्षणांवरून तसेच ‘मज्जातंतू वहन चाचणी’ (एनसीव्ही) आणि मेंदू आणि पाठीच्या कण्याभोवती असणारे द्रवामध्ये प्रोटीन्स आहेत का हे पाहून ठरवले जाते. परंतू, बहुतांश वेळा केवळ लक्षणांवरूनच या रुग्णांचे निदान केले जात आहे. शासनाकडूनही त्याबाबत स्पष्ट मार्गदर्शक तत्वे आलेली नाहीत. त्यामुळे, चुकीचे निदान होण्याची दाट शक्यता व्यक्त केली जात आहे..‘या रुग्णाला ‘जीबीएस’ सदृश लक्षणे होती. परंतु, पडताळणीअंती ‘जीबीएस’ नसल्याचे समितीने स्पष्ट केले आहे. या रुग्णाचा मृत्यू इतर कारणांमुळे झाल्याचेही कागदपत्रांवरून समोर आलेले आहे. आता त्याची नोंद महापालिकेकडे कोणत्या स्वरूपात करायची याबाबत विचार विनिमय सूरू आहे.- एक वरिष्ठ आरोग्य अधिकारी, पुणे मनपा आरोग्य विभाग.सकाळ+ चे सदस्य व्हा ब्रेक घ्या, डोकं चालवा, कोडे सोडवा!शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Pune News : पुण्यातील तो’ मृत्‍यू ‘जीबीएस’चा नाही; मृत्‍यू संशोधन समितीचा अहवाल

Related Stories