घोरपडीकरांना रेल्वे फाटकमुक्त प्रवासाची प्रतीक्षा...

घोरपडी, ता. २२ : येथील मिरज रेल्वे मार्गावरील उड्डाण पुलाचे काम गेल्या काही वर्षांपासून सुरू असून अद्याप पूर्णत्वास गेलेले नाही. या प्रकल्पाची मुदत संपून सहा महिने उलटले तरी काम पूर्ण न झाल्याने या भागात दररोज सकाळ आणि सायंकाळच्या वेळी वाहतूक कोंडी होते.
या पुलाचे काम पूर्ण करण्याची मुदत २०२५ अखेर निश्‍चित केली होती. मात्र, सध्या कामाचा वेग अतिशय संथ आहे. मुख्यमंत्री देवेंद्र फडणवीस यांनी महाराष्ट्र ‘फाटकमुक्त’ करण्याची घोषणा केली असली, तरी घोरपडीतील सद्यःस्थिती पाहता हा परिसर फाटकमुक्त कधी होणार, असा प्रश्‍न उपस्थित होत आहे. रेल्वे फाटकामुळे हडपसर, घोरपडी, मुंढवा, कॅम्प आणि पुणे स्टेशनकडे जाणाऱ्या प्रवाशांचे इंधन आणि वेळ वाया जात आहे. येथील कोंडीत रुग्णवाहिका आणि शालेय बसही अडकून पडतात. त्यामुळे या पुलाचे काम तातडीने पूर्ण झाल्यास या भागातील वाहतूक व्यवस्था सुरळीत होण्यास मदत होईल.