Grampanchyat Election Result : भाजपचे पुणे जिल्हा ग्रामिण दक्षिणमध्ये ग्रामपंचायत निवडणुकीत घवघवीत यश

कुरकुंभ - भारतीय जनता पक्षाने पुणे जिल्हा ग्रामिण दक्षिणमध्ये ग्रामपंचायतीच्या सरपंच व सदस्यपदाच्या निवडणुकीत घवघवीत यश मिळून नंबर एकचा पक्ष झाला असून पक्षाने २७ ग्रामपंचायतीत सत्ता मिळविल्याची माहिती भाजपचे पुणे ग्रामिण दक्षिणचे जिल्हाध्यक्ष वासुदेव काळे यांनी दिली.

पुणे जिल्हा दक्षिणमधील १०५ ग्रामपंचायतीच्या निवडणूका पार पडल्या. त्यापैकी भाजपने प्रदेशाध्यक्ष चंद्रशेखर बावनकुळे, उपमुख्यमंत्री देवेंद्र फडणवीस, शिक्षणमंत्री चंद्रकांत पाटील यांच्या मार्गदर्शनखाली २७ ग्रामपंचायतीत भाजपने सत्ता मिळविली आहे. इतर राजकीय पक्षाच्या तुलनेत भाजप जिल्ह्यात ग्रामिण दक्षिणमध्ये नंबर एकचा पक्ष ठरला आहे.

राज्यात झालेल्या नवीन सत्ता समिकरणाच्या पार्श्वभूमीवर ग्रामपंचायतीचे निकाल येणाऱ्या निवडणुकात दिशादर्शक ठरतील. या निवडणुकांच्या निमित्ताने जिल्हातील बारामतीसह सर्व विधानसभा मतदारसंघात भाजपला प्रतिनिधीत्व करण्याची मतदारांनी संधी दिली आहे.

मतदारांनी टाकलेल्या विश्वासाला भाजपचे नवनिर्वाचित सरपंच व सदस्य तडा जाऊन देणार नाही. विकासकामांसाठी राज्य व केंद्र सरकार या पदाधिकाऱ्यांच्या पाठीशी खंबीरपणे उभे राहिल असा विश्वास श्री. काळे यांनी व्यक्त केला.

भाजपने पुणे ग्रामिण दक्षिणमधील यश मिळविलेल्या ग्रामपंचायतीची आकडेवारी पुढीलप्रमाणे तालुका व ग्रामपंचायतीची संख्या दिली आहे. दौंड - ९ , बारामती- ३, इंदापूर- ३, भोर- ३, मुळशी- ३, पुरंदर- ४, वेल्हा-२.