Pune : लष्करातील जवानांना लाभले हठयोगाचे प्रशिक्षण ; ‘ईशा फाउंडेशन’चा उपक्रम,सद्‌गुरू यांचे मार्गदर्शन

घोरपडी : लष्करातील जवानांसाठी ‘योगा फॉर स्ट्रेस मॅनेजमेंट अँड होलिस्टिक वेलनेस’ उपक्रमाचा समारोप सोहळा पुण्यात उत्साहात झाला. कॅम्पमधील मिल्खा सिंग क्रीडासंकुलातील सोहळ्यात ‘ईशा फाउंडेशन’चे संस्थापक सदगुरू यांनी मार्गदर्शन केले. नऊ राज्यांतील २३ ठिकाणी ११ हजारांहून जास्त जवानांनी या उपक्रमाचा लाभ घेतला.

सदर्न कमांडचे जनरल ऑफिसर-कमांडिंग-इन-चीफ लेफ्टनंट जनरल अजय कुमार सिंग, लष्करातील शेकडो कर्मचारी आणि त्यांच्या कुटुंबातील सदस्य उपस्थित होते. सदगुरू म्हणाले, ‘‘लष्करी प्रशिक्षणामुळे शरीर मजबूत होते, तर योगामुळे मन तसेच बुद्धी विकसित होते. त्यामुळे जवानांनी व्यग्र आणि तणावपूर्ण जीवनातून थोडा वेळ ध्यानधारणेसाठी द्यावा.’’

जैसलमेर, झाशी, ग्वाल्हेर, जामनगर, पुणे, सिकंदराबाद, बंगळूर, कोइमतूर, कन्नूर व इतर ठिकाणांहून सुमारे चाळीस हजार जवान सोहळ्यात ऑनलाइन पद्धतीने सहभागी झाले. अजय कुमार सिंग म्हणाले, ‘‘हठयोगाचे प्रशिक्षण घेतलेल्या सगळ्यांचे कौतुक आहे.

योगामुळे सैन्यातील तणावपूर्ण जीवनात मोठा बदल होत आहे. त्यांच्या दैनंदिन दिनचर्येत योगाचा समावेश केल्याने अनेक सैनिकांना प्रशिक्षणादरम्यान शांत, तणावमुक्त होण्यास मदत झाली. हे प्रशिक्षण सगळ्या जवानांनी घ्यावे म्हणून सदर्न कमांड सहकार्य करेल.’’