‘एचए’ स्वेच्छानिवृतीधारकांना दीडपट रक्कम मिळणार

पिंपरी - हिंदुस्थान एन्टिबायोटिक्‍स (एचए) कंपनीतील सुमारे १०४  स्वेच्छानिवृत्तीधारक कामगारांना ‘व्हीआरएस’पोटी दीडपट रक्कम देण्याला कंपनी व्यवस्थापनाने तत्त्वतः मान्यता दिली आहे. दहा दिवसांत ही रक्कम दिली जाणार आहे. उर्वरित देणीदेखील ३१ जानेवारीपर्यंत दिली जातील, असे आश्‍वासन व्यवस्थापनाने दिले आहे.

ताज्या बातम्यांसाठी डाऊनलोड करा ई-सकाळचे ऍप

एचए कंपनीमधील २५० स्वेच्छानिवृत्तीधारक कामगारांपैकी १०४ कामगारांना ‘व्हीआरएस’पोटी दीडपट रकमेऐवजी एकपटच रक्कम दिल्याने व्यवस्थान आणि स्वेच्छानिवृत्तीधारक कामगारांमध्ये मोठा वाद निर्माण झाला होता. एचए मजदूर संघ (एचएएम) कडून व्यवस्थापनाला सर्व देणी देण्याबाबत दोन दिवसांची मुदत देण्यात आली होती. त्यावर व्यवस्थापनाने अखेर सामंजस्याची भूमिका घेत ‘व्हीआरएस’ची उर्वरित रक्कम देण्यास मान्यता दिली आहे. 

पुण्याच्या बातम्या वाचण्यासाठी येथे ► क्लिक करा

एचए मजदूर संघाचे सरचिटणीस संजय भोसले म्हणाले, ‘‘येत्या ८ ते १० दिवसांत १०४ कामगारांना ‘व्हीआरएस’च्या एकपट ऐवजी दीडपट रक्कमा देण्यास तत्त्वतः मान्य केले आहे. आवश्‍यक (एनडीसी) प्रक्रिया पूर्ण झाल्यावर पुढील आठवड्यापासून ग्रॅच्युइटीचेही धनादेश मिळण्यास सुरवात होणार आहे.’’

माजी सरचिटणीस अरुण बोऱ्हाडे म्हणाले, ‘‘रजा रोखीकरणाच्या रकमा निश्‍चित करण्यात काही त्रुटी राहिल्या होत्या. त्यातही सुधारणा केल्या जाणार आहेत.’