बजाज फायनान्सचा डेटा हॅक केलाय म्हणत मागितली ११.६३ कोटींची खंडणी

पुणे - बजाज फायनान्सचे संजीव बजाज यांच्याकडे खंडणी मागितल्याचा प्रकार उघडकीस आला आहे. त्यांच्याकडे ई मेलद्वारे ११ कोटी ६३ लाख रुपयांची मागणी करण्यात आली. तसंच खंडणी दिली नाही तर कंपनीचा सर्व डेटा हॅक करून मोठं नुकसान करू अशी धमकी यात देण्यात आली आहे.

बजाज फायनान्सकडून याप्रकरणी पोलिसात तक्रार दाखल करण्यात आली आहे. पुण्यात विमानतळ पोलिस ठाण्यात ई मेल पाठवणाऱ्या विरोधात गुन्हा दाखल केला आहे. याप्रकरणी कंपनीच्यावतीने युवराज मोरे यांनी फिर्याद दिली आहे. कंपनीचे वरिष्ठ अधिकारी संजीव बजाज, दीपक रेड्डी, दीपक बजारी आणि संजीव जैन यांना Narasa.petrova@protomail.com या आयडीवरून मेल पाठवण्यात आल्याचं पोलिसांनी म्हटलं आहे.

ई मेलमध्ये DOGE COIN च्या माध्यमातून ११ कोटी ६३ लाख २९ हजार रुपयांची मागणी करण्यात आली होती. कंपनीला हा मेल २८ नोव्हेंबर २०२१ रोजी पाठवला होता. या प्रकरणी सायर पोलिस ठाण्यात तक्रारही करण्यात आली होती. याचा तपास सध्या पोलिस करत आहेत.

Doge कॉइन ही क्रिप्टो करन्सी असून ती परदेशातील दोन कम्प्युटर इंजिनिअर्सनी तयार केली आहे. या कॉइनच्या स्वरुपात ७३ लाख ९५ हजार ३७३ कॉइन मागण्यात आले होते. याची किंमत भारतीय चलनात ११ कोटी ६३ लाख २९ हजार २१७ रुपये इतकी होते.