Pune Rain News : पावसामुळे खराडीत पूरस्थिती घर सोसायटी, वाहनांचे नुकसान

वडगाव शेरी : नगर रस्ता परिसरात झालेल्या मुसळधार पावसामुळे खराडीतील आपले घर सोसायटी येथे पूरस्थिती निर्माण होऊन वाहनांचे नुकसान झाले. तसेच नागरिकांच्या घरातही पाणी गेले. पावसाळ्यात निर्माण होणाऱ्या पूरस्थितीचा सामना येथील रहिवाशी अनेक वर्षांपासून करीत आहेत.

नगर रस्ता परिसरात शनिवारी दुपारी दोन वाजण्याच्या सुमारास मुसळधार पाऊस झाला. विमाननगर, संजय पार्क, नगर रस्ता आणि खराडीतील अनेक सकल भागात पावसाचे पाणी साचले होते. पावसामुळे निर्माण झालेल्या पूरस्थितीचा सर्वाधिक फटका खराडी येथील आपले घर या भागात बसला.

आपले घर सोसायटीतील लेन क्रमांक सहा येथे सकल भाग असल्यामुळे आणि पावसाळी वाहिन्या नसल्यामुळे पाणी जमले. शिवाय येथील सांडपाणी वाहिन्या खूप जुन्या आणि लहान असल्यामुळे पावसाचे पाणी जायला अडथळा येतो.

ही समस्या दूर करावी या मागणी करता दोन महिन्यांपूर्वी येथील रहिवाशांनी आंदोलनही केले होते. मात्र आंदोलनावेळी मिळालेल्या आश्वासनावर कोणतीही प्रत्यक्ष अंमलबजावणी झाली नाही. आज दुपारी झालेल्या पावसामुळे या भागात पाणी साचून काही नागरिकांच्या घरात पाणी घुसले. तर वाहने पाण्यात बुडाल्याने नुकसान झाले.

येथे पावसाळी वाहिनी टाकावी लागेल. आज कर्मचारी पाठवून पावसाचे पाणी काढण्यासाठी नागरिकांना मदत करायला सुरुवात केली आहे

- हेमंत देसाई (उपाभियंता, ड्रेनेज विभाग, पुणे महानगरपालिका)

येथे पावसाचे पाणी साचून नागरिकांना त्रास होतो. परंतु ही समस्या सोडवण्यासाठी नेमक्या काय उपाययोजना केल्या हे वरिष्ठ अधिकारी सांगतील.

पूजा ननावरे ( कनिष्ठ अभियंता नगर रस्ता क्षेत्रीय कार्यालय)

पुणे महानगरपालिकेचे अधिकारी येऊन फक्त पाहणी करून आणि आश्वासन देऊन जातात. प्रत्यक्षात काम होत नाही. पावसाळी वाहिनी टाकण्याकरता क्षेत्रीय कार्यालयाने तातडीने पाऊले उचलावीत.

तानाजी शेरखाने (नागरिक )