गृहनिर्माण सोसायट्यांत घरपोच धान्य, भाजीपाला 

पुणे - राज्य सरकारच्या सहकार विकास महामंडळाने गृहनिर्माण सोसायट्यांमधील सभासदांना आता थेट घरपोच धान्य, भाजीपाला आणि फळे पुरवण्यासाठी महत्त्वाचे पाऊल उचलले आहे. सोसायट्यांमधील सभासदांनी मागणी नोंदविल्यास धान्य आणि किराणा दोन दिवसांत तर, ताजा भाजीपाला दुसऱ्या दिवशी घरपोच मिळणार आहे. 

बातम्या ऐकण्यासाठी डाऊनलोड करा ई-सकाळचे ऍप

"घराबाहेर पडून नका येऊ कोरोनाच्या सानिध्यात, आम्ही पोचवू शेतमाल आपल्या दारात' हे ब्रीदवाक्‍य घेऊन महाराष्ट्र सहकार विकास महामंडळ प्रत्येक सोसायटीत पोचणार आहे. सहकार व पणन मंत्री बाळासाहेब पाटील यांच्या पुढाकारातून विशेष कार्याधिकारी संतोष पाटील, राज्य सहकार महामंडळाचे व्यवस्थापकीय संचालक मिलिंद आकरे, जिल्हा उपनिबंधक नारायण आघाव यांच्यासह संपूर्ण टीम सज्ज झाली आहे. सोसायट्यांमधील सभासद आणि शेतकरी, शेतमाल उत्पादक कंपन्यांमध्ये महामंडळ समन्वयाची भूमिका बजावणार आहे. एखाद्या सभासदाने संकेतस्थळावर जाऊन धान्य किंवा भाजीपाल्याची मागणी नोंदविल्यास त्यानुसार महामंडळाचे अधिकारी संबंधित शेतकरी आणि कंपनीसोबत संपर्क साधतील. त्यानुसार सोसायट्यांना घरपोच पुरवठा करण्यात येईल. 

Coronavirus : लॉकडाऊनमध्येही तुम्हाला करता येणार परराज्यात प्रवास

अशी नोंदवा मागणी... 
1. महाराष्ट्र राज्य सहकार महामंडळाच्या www.mcdc.com या संकेतस्थळावर जाऊन धान्य, किराणामाल, पालेभाज्या आणि फळांची मागणी नोंदविता येईल. 

2. सोसायटीमधील प्रत्येक सभासदाला मागणी नोंदवता येईल. परंतु, यामध्ये समन्वयक म्हणून सोसायटीचे चेअरमन किंवा सचिव काम पाहतील. 

3. प्रत्येक सोसायटीला विशिष्ट कोड क्रमांक देणार आहे. त्याचा वापर करून सभासद मागणी नोंदवू शकतील. 

संकेतस्थळावर अर्जात भरावयाची माहिती ः 
गृहनिर्माण सोसायटीचे नाव, पत्ता, सभासदाचे नाव, मोबाईल क्रमांक व शेतमालाचा तपशील : गहू, ज्वारी, बाजरी, तांदूळ, पीठ, डाळी, किराणामाल, तेल, मसाले, सुकामेवा, लोणचे, पापड, भाजीपाला, फळभाज्या, फळे, बेकरी पदार्थ, अंडी, दुग्धजन्य पदार्थ याची मागणी नोंदविता येईल. 

नोंदणीसाठी येथे साधा संपर्क... 
9404515537 
9225563987 
8483881018 

कोरोनाचा प्रादुर्भाव वाढू नये यासाठी सोसायट्यांमधील सभासदांना रास्त दरात घरपोच धान्य, भाजीपाला आणि फळे मिळावीत यासाठी सहकार महामंडळाने हा निर्णय घेतला आहे. भविष्यात प्रत्येक सोसायटीसाठी बाराही महिने ही सुविधा उपलब्ध करून देणार आहे. 
- मिलिंद आकरे,  व्यवस्थापकीय संचालक, राज्य सहकारी महामंडळ