नागरिकांनो, सावधान ! असेच वागत राहिलात तर पास रद्द होतील अन्...

वाघोली (पुणे) : वाघोली ग्रीन झोनकडे जात आहे. मात्र, शेतमाल विक्रीसाठी येणारे शेतकरी व विक्रेते यांचा बेजबाबदारपणा महागात पडू शकतो. आव्हाळवाडी फाट्यावर सकाळी आठच्या सुमारास शेतकरी शेतमाल विक्रीसाठी घेऊन येतात. त्यामुळे भाजीपाला विक्रेत्यांची गर्दी होते. त्यामुळे सामाजिक अंतराचा पूर्ण फज्जा उडतो. दरम्यान बेजबाबदारपणा करणाऱ्यांचे अत्यावश्‍यक सेवेचे पास रद्द केले जातील. असा इशारा पोलिस निरीक्षक प्रताप मानकर यांनी दिला आहे. 

आणखी वाचा - पुण्यातील `हा` विलगीकरण कक्ष बंद करण्याची मागणी 

सध्या वाघोलीत चार रुग्ण आहेत. मागील दहा दिवसापासून एकाही रुग्णाची वाढ झालेली नाही. 16 एप्रिलपासून किराणा दुकाने, भाजीपाला विक्री बंद आहे. केवळ घरपोच सेवा सुरू आहे. पोलिस, प्राथमिक आरोग्य केंद्र, ग्रामपंचायत व लोकप्रतिनिधी दिवस- रात्र एक करून काळजी घेत आहेत. मात्र, अनेक भाजी विक्रेते अंतर्गत रस्त्यावर विक्री करतात. विक्रेत्यांची संख्याही खूप वाढली आहे.

सकाळी आठ वाजण्याच्या सुमारास अनेक शेतकरी वाहनामध्ये भाजीपाला घेऊन आव्हाळवाडी फाट्यावर थांबतात. त्यामुळे विक्रेते तो माल खरेदी करण्यासाठी गर्दी करतात. काही नागरिकही खरेदीसाठी येतात. सामाजिक अंतराचा फज्जा तर उडतोच शिवाय काहीजण मास्कही वापरत नाहीत. पोलिस आले की पळून जातात. हे चित्र मागील काही दिवसांपासून दिसत आहे. 

पुण्याच्या इतर बातम्या वाचण्यासाठी येथे- क्लिक करा

या सर्वांचा बेजबाबदारपणा वाघोलीकरांना महागात पडू शकतो. सध्या आपण ग्रीन झोन कडे जात आहे. आपला बेजबाबदारपणा चूक घडवू शकतो याचा विचार प्रत्येक नागरिकाने करायला हवा. एक भाजी विक्रेता कोरोना बाधित झाल्याची अफवाही तीन चार दिवसांपूर्वी पसरली होती. आम्ही घरीच राहू कोरोनाला रोखू अन ग्रीन झोन मध्ये जाऊ अशी प्रतिज्ञाच प्रत्येक वाघोलीकराने करायला हवी. 

वाघोली परिसर सील केलेला आहे. किराणा व भाजीपाला विक्रेत्यांना घरपोच सेवा देण्यास सांगितले आहे. मात्र, काही जण बेजबाबदारपणे वागत असल्याचे समजते. मात्र त्यांची गय केली जाणार नाही. अत्यावश्‍यक सेवेचे पास तर रद्द होतीलच शिवाय गुन्हाही दाखल होईल. 
- प्रताप मानकर, पोलिस निरीक्षक, लोणी कंद पोलिस ठाणे. 

ग्रामपंचायत कर्मचाऱ्यांना तेथे थांबवून असा प्रकार होणार नाही याची काळजी घेऊ. 
- महादेव चव्हाण, ग्रामविकास अधिकारी, वाघोली.