पुणे : वैकुंठ स्मशानभूमीत असुविधा

पुणे : नवी पेठेतील वैकुंठ स्मशानभूमीत अपुरे कर्मचारी असल्याने तेथील कामावर परिणाम होत असून, नागरिकांना वेळेवर सेवा मिळत नाही. बराच वेळ ताटकळत उभे राहावे लागत आहे. तसेच तेथील कंत्राटी कामगारांना वेळेवर वेतन मिळत नाही, पीएफ व इतर सुविधा मिळत नसल्याचे तेथील कर्मचाऱ्यांनी सांगितले. दरम्यान, महापालिकेच्या अधिकाऱ्यांनी वैकुंठ स्मशानभूमीत कोणतीही गैरसोय होत नसल्याचा दावा केला आहे.

शहरात सर्वाधिक अंत्यसंस्कार हे वैकुंठ स्मशानभूमीत केले जातात, रोज किमान १० ते १५ शव दहन केले जातात. या ठिकाणी पारंपारिक पद्धतीसह विद्युत दाहिनी, गॅस दाहिनीवर अंत्यसंस्कार केले जातात. यापूर्वी वैकुंठ स्मशानभूमीत आरोग्य विभागाचे कर्मचारी होते, पण आता ठेकेदारी पद्धतीने कर्मचारी नियुक्त केले जात आहेत. तीन पाळ्यांसाठी १४ कर्मचारी काम करत आहेत.

शरद क्रीडा व सांस्कृतिक प्रतिष्ठानचे अध्यक्ष लक्ष्मीकांत खाबिया म्हणाले,‘‘वैकुंठ स्मशानभूमीमध्ये जाणे झाले, त्यावेळी अंत्यविधीला वेळ होत असल्याचे जाणवले. पण तेथे अपुरे कर्मचारी असल्याने तेथे योग्य पद्धतीने सेवा मिळत नाही. तेथील कामगारांना वेळेवर पगार मिळत नाही, पीएफ, इएसआयही यातही तफावत आहे. येथील शेडमध्ये अस्वच्छताही आहे. महापालिकेने येथील व्यवस्था सुधारण्याकडे लक्ष दिले पाहिजे. विद्युत विभागाचे मुख्य अभियंता श्रीनिवास कंदूल म्हणाले, ‘‘ठेकेदाराकडून पुरेसे मनुष्यबळ उपलब्ध केले आहे, या कर्मचाऱ्यांना वेतन वेळेवर दिले जाते. पीएफ व इएसआय याची तपासणी केली जाईल.