महापालिका कर्मचाऱ्यांच्या सुरक्षाकवच योजनेला वाढ

पुणे : कोरोना विषाणू प्रतिबंधक उपाययोजनेसाठी (Corona virus inhibitor) कार्यरत असलेल्या महापालिकेच्या (Pune muncipal corporation) अधिकारी आणि कर्मचाऱ्यांच्या सुरक्षा कवच योजनेला मुदतवाढ दिली आहे. कोरोना विषाणू संसर्गग्रस्त रुग्णांशी प्रत्यक्ष संबंध येऊन महापालिका कर्मचारी किंवा अधिकाऱ्यांनाही त्यांची लागण होत होती, त्यामध्ये प्रकृती गंभीर होऊन आत्तापर्यंत ५० पेक्षा जास्त जणांचा मृत्यू झाला आहे. (Pune News)

केंद्र सरकारच्या राष्ट्रीय स्वास्थ मिशन अंतर्गत कर्मचाऱ्यांच्या वारसांना ५० लाख रुपये विमा रक्कम म्हणून दिली जाते. केंद्र आणि राज्य सरकार या योजनेला जोपर्यंत मुदत देर्इल, तोपर्यंत किंवा भारतीय साथ रोग कायद्यानुसार जोपर्यंत साथ आटोक्यात आल्याची घोषणा सरकार करीत नाही, तोपर्यंत या योजनेला मुदतवाढ देण्याच्या प्रस्तावाला दिली, असे स्थायी समितीचे अध्यक्ष हेमंत रासने यांनी सांगितले.

प्रभू श्रीरामचंद्राचे शिल्प

आंबेगाव पठार येथे दीड एकर जागेत प्रभू रामचंद्राचे शिल्प उभारण्यासाठी दोन कोटी रुपयांचा निधी स्थायी समितीच्या बैठकीत मंजूर केला आहे. लोकांच्या हृदयात श्रीराम आणि त्यांच्या जीवनमूल्यांची जोपासना व्हावी, या उद्देशाने शिल्प निर्मिती करणार आहे.

राष्ट्रीय स्वयंसेवक संघ व संघटनांनी हे शिल्प उभारावे अशी मागणी केली होती, असे हेमंत रासने यांनी सांगितले. हा प्रस्ताव नगरसेविका वर्षा तापकीर यांनी दिला होता.