पिंपरी-चिंचवडमध्ये आठवडे बाजाराला हप्तेखोरीचे ‘कवच’

पिंपरी - ग्रामीण भागातील आठवडे बाजार संस्कृती पिंपरी-चिंचवड शहरात गेल्या काही वर्षांपासून चांगलीच नावारूपाला आली आहे. मात्र रस्ते, पदपथ अडवून राजरोसपणे भरणाऱ्या या बाजारांना महापालिका अधिकारी, राजकारणी आणि स्थानिक कार्यकर्त्यांच्या हप्तेखोरीचे ‘कवच’ मिळत असल्याने आठवडे बाजाराचा ‘बाजार’ फोफावला आहे.

ताज्या बातम्यांसाठी डाऊनलोड करा ई-सकाळचे ऍप

आठवडे बाजार म्हणजे आठवड्याच्या एका विशिष्ट दिवशी व ठिकाणी भरणारा बाजार. परंतु, आता काही परिसरात तो चार दिवस भरविला जात आहे. अशाप्रकारे प्राधिकरण, रावेत, भोसरी, रहाटणी, चिंचवड या भागात दोन दिवस तर वाकड-विशालनगर परिसरात नव्याने बनविलेल्या आणि जुन्या पदपथावर दर सोमवार, मंगळवार, शुक्रवार आणि शनिवार या दिवशी तो भरतो. त्यासाठी स्टॉलधारकांकडून रुपये प्रत्येकी ३०० वसूल केले जात असल्याची तक्रार आहे. 

फोटो फिचर - सकाळ ब्यूटी ऑफ महाराष्ट्र २०२०

पदपथाच्या जागांचे दर
आठवड्यातील एका दिवसासाठी भरणारे बाजार स्थानिक कार्यकर्त्यांच्या हप्तेखोरीचे साधन बनले आहे. या बाजारात पदपथावरील जागांचे दरही ठरतात. मोक्‍याची जागा मिळविण्यासाठी संबंधिताला हाताशी धरले जाते. नागरिकांसाठी मात्र ते डोकेदुखी ठरत आहेत. तर शहर नियोजनात अडथळा ठरत आहेत. वाकड-विशालनगर परिसरात नव्याने बांधलेले पदपथ चार दिवस व्यापले जात आहेत. परिणामी, बालेवाडी किंवा हिंजवडी येथून विशालनगर मार्गे जाणाऱ्या डीपी रस्त्याला सायंकाळी कोंडीचा सामना करावा लागतो. तसेच येथे अपघातही होतात. सायंकाळी ज्येष्ठांना पदपथावरून चालणे मुश्‍कील होतो. मध्यंतरी बाजारांवर बंदी घातली होती. मात्र, काही दिवसांनी तो पुन्हा जोमाने सुरू झाला असून त्याला आता हप्तेखोरांचे कवच लाभल्याने बाजाराची समस्या गंभीर होत आहे.