Marriage Card : अबब..... शिव विवाह सोहळ्याचे ३६ पानांचे लग्नाचं आवतनं....

जुन्नर - शिव विवाह सोहळ्याचे ३६ पानी लग्नाचं आवतनं..... प्रागतिक विचारांच्या चंद्रशेखर शिखरे परिवाराची ही आगळी वेगळी वैचारिक लग्नपत्रिका चर्चेचा विषय झाली आहे.

विवाह जमवताना ३६ गुण पाहिले जातात परंतु येथे पत्रिकेमध्ये ३६ पाने ही विविध विचारक व पुरोगामी व पौराणिक ऐतिहासिक सामाजिक या विषयांवर भाष्य करणारी आहे. नातेवाईक व इतर नावांना बगल देत नवं दाम्पत्याच्या शैक्षणिक आलेखाचा सचित्र परिचय दिला आहे तर ३६ महान व्यक्तींची फोटोसह माहिती दिली आहे.

छत्रपती संभाजीनगर येथील मराठा सेवा संघाचे चंद्रशेखर वसंत शिखरे यांची कन्या ईशिता व बल्लाळवाडी ता. जुन्नर येथील मारुती प्रभाकर डोंगरे यांचा मुलगा मयूर यांचा शुभविवाह २३ एप्रिल रोजी छत्रपती संभाजीनगर येथे होत आहे. पत्रिकेत वधू व वरचा फोटो व अल्प परिचय देण्यात आला आहे. ईशिका व मयूर दोघेही उच्चशिक्षित असून जर्मनी येथे उच्च पदावर कार्यरत आहेत. याच बरोबर शिखरे परिवाराचा ग्रुप फोटो व माहिती देण्यात आली आहे.

आवली व संत तुकाराम, शिव-पार्वती विवाह सावित्रीबाई व महात्मा ज्योतिराव फुले यांची माहिती तसेच जिज्ञासक महदंबा, संत जनाबाई संत मुक्ताबाई, अक्का महादेवी यांची माहिती देण्यात आली आहे. कॅप्टन लीलाताई व सेनानी डॉ. उत्तमराव पाटील जिजाऊ व शहाजीराजे, संत सोयराबाई व संत चोखामेळा, सईबाई व छत्रपती शिवराय, महाराणी देवी व सम्राट अशोक, महाराणी चिमणाबाई व सयाजीराव गायकवाड या उभयतांची तसेच ताराबाई शिंदे, डॉ. रखमाबाई राऊत, बहिणाबाई चौधरी, सरोजनी नायडू यांच्या सचित्र माहिती, संत व महात्मे यांचे प्रसिद्ध अभंग दिले आहेत.

यासाठी चांगल्या प्रतीचा कागद व आधुनिक छपाई तंत्रज्ञानाचा वापर पुणे येथील जिजाऊ प्रकाशन यांनी केला आहे. सर्वसाधारणपणे लग्नपत्रिकेत कुटुंबाची व नातेवाईकांची शुभाशीर्वाद देणाऱ्या पुढाऱ्याची नामावली असते पण ही याचा कोठेही उल्लेख नसल्याने ही पत्रिका वाचून संग्रही ठेवण्यायोग्य आहे.