पुणे - आजोबा व चुलते माजी सैनिक आणि त्यांचा मुलगा कारगिल युद्धात शौर्य गाजवलेला निवृत्त सैन्य अधिकारी. अशा एका कुटुंबाला फक्त ‘मुस्लिम’ म्हणून धार्मिक झुंडशाहीचा सामना करावा लागल्याची धक्कादायक घटना (ता. 26) खराडीतील चंदननगर येथे घडली आहे. .विविध ठिकाणांवरून जमलेल्या धार्मिक संघटनांच्या दबावापोटी या कुटुंबाला पोलीस ठाण्यात मध्यरात्री एक वाजता आपले भारतीयत्व सिद्ध करावे लागले. वर्षानुवर्षे गुण्यागोविंदाने नांदणाऱ्या चंदननगर खराडी भागात ही घटना घडल्यामुळे येथील सलोख्याच्या वातावरणाला गालबोट लागले आहे हे मात्र दुर्दैव.चंदननगर येथील शमशाद अली शेख यांनी या प्रकरणी चंदन नगर पोलिसांकडे तक्रार दिली आहे. मात्र पोलिसांनी अद्याप कोणावरही गुन्हा दाखल केलेला नाही. कुटुंबीयांचे आजोबा व चुलते भारतीय सैन्य दलामध्ये आपली सेवा बजावत निवृत्त झालेले आहेत..तर रहिवासी इरशाद शेख यांचे सख्खे बंधू कारगिल युद्धात सहभागी झाले होते. त्यांना भारतीय सैन्यामध्ये चांगली सेवा केल्याबद्दल अनेक पदके देखील मिळालेले आहेत. हे कुटुंबीय सुमारे 55 वर्षांपेक्षा अधिक कालावधीपासून चंदननगर भागामध्ये राहत आहे.कुटुंबियांनी दिलेल्या माहितीनुसार, काही धार्मिक संघटनांच्या सुमारे 70 ते 80 लोकांच्या टोळक्याने (दि. 26) रोजी रात्री बारा वाजता घरात घुसून गोंधळ घालून रोहिंग्या, बांगलादेशी इत्यादी आक्षेपार्ह शब्दांचा वापर करून तुम्ही इथून निघून जा अशा प्रकारचा दबाव कुटुंबीयांवर निर्माण केला. घरातील एका शाळकरी विद्यार्थ्याला झोपेतून उठून आधार कार्ड मागितले आणि शिवीगाळ केली..या संपुर्ण घटनेवेळी त्यांच्या समवेत चंदननगर पोलीस ठाण्याचे पोलीस देखील उपस्थित होते व ते हा संपूर्ण प्रकार केवळ मूकपणे पाहत होते, असा आरोप या कुटुंबीयांनी केला आहे. केवळ धार्मिक संघटनांच्या दबावामुळे सैन्य दलात सेवा केलेल्या कुटुंबीयांना नागरिकत्व सिद्ध करण्यासाठी आणि चौकशीसाठी पहाटेपर्यंत तीन वाजेपर्यंत पोलीस स्टेशनमध्ये बसवण्यात आले होते..नगर रस्ता परिसरात धार्मिक झुंडशाहीचा असा प्रकार यापूर्वी कधीही घडलेला नव्हता. निवडणुकीच्या पार्श्वभूमीवर काही धार्मिक संघटना जाणीवपूर्वक दोन समाजामध्ये द्वेष निर्माण करण्याचा प्रयत्न करीत आहेत. या धार्मिक संघटनांमध्ये परप्रांतीयांचा मोठ्या प्रमाणात सहभाग वाढला आहे. याप्रकरणी शमशाद शेख यांनी चंदननगर पोलिसांकडे लेखी तक्रार दिली आहे.नॅशनल मायनॉरिटी फोरमचे अध्यक्ष राहुल डंबाळे यांनी पीडित कुटुंबाची भेट घेतली व त्यानंतर पोलीस उपायुक्तांशी संपर्क साधून कारवाईची मागणी केली. ते म्हणाले, अलीकडच्या काळात धार्मिक द्वेष वाढवणाऱ्या या घटना वाढल्या आहेत. पुणे पोलीस आयुक्तांनी याला वेळीच आवर घालावा..शमशाद शेख (रहिवासी चंदन नगर) -धार्मिक द्वेषापोटी मध्यरात्री घरात घुसून फक्त मुस्लिम म्हणून त्रास देणाऱ्या समाजकंटकांवर पोलिसांनी कारवाई करावी. समाजकंटक कुटुंबियांना शिवीगाळ आणि धक्काबुक्की करत असताना पोलीस फक्त पाहत होते.सीमा ढाकणे (वरिष्ठ पोलीस निरीक्षक चंदननगर) -शहरातील विविध ठिकाणावरून आलेले धार्मिक संघटनांचे कार्यकर्ते चंदननगर मध्ये रात्री जमल्याची माहिती मिळाल्यानंतर त्या जागेवर पोलीस पाठवले. खबरदारी म्हणून शेख कुटुंबीयांना पोलीस ठाण्यात आणून आधार कार्ड आणि नागरिकत्व तपासले. रात्री दीड वाजता त्यांना घरी पाठवले. घोषणा देणाऱ्या आणि दबाव निर्माण करणाऱ्या धार्मिक संघटनांच्या पदाधिकाऱ्यांना पुन्हा असे न करण्याची समज दिली आहे. अद्याप गुन्हा दाखल केलेला नाही..सकाळ+ चे सदस्य व्हा ब्रेक घ्या, डोकं चालवा, कोडे सोडवा!शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.
