Pune News : सोशल मिडीयावरही कात्रज-कोंढवा रस्ता चर्चेत !

Pune News : रखडलेले रुंदीकरण आणि सातत्याने होणारे अपघात यामुळे मागील काही दिवसांपासून कात्रज-कोंढवा रस्ता कायम चर्चेत राहिला आहे. मात्र, नागरिकांबरोबर कात्रज-कोंढवा रस्ता समाज माध्यमांवरही चर्चेत आल्याचे दिसून येते. नागरिकहो सावधान! अशा आशयाचा फलक असलेला फोटो सध्या समाज माध्यमांवर चांगलाच व्हायरल होत आहे.

'नागरिक हो सावधान! हा कात्रज कोंढवा रोड नाही, यमलोकला जाणारा रोड आहे, तरी कृपया सावधानतेने गाडी चालवा, ५८ अपघात आणि २६ निष्पाप लोकांचे बळी गेले आहेत. आठ वर्षे झाली महापालिका रोड करत आहे. सोंग घेऊन झोपलेल्या प्रशासनाचा जाहीर निषेध, सौजन्य एक त्रस्त नागरिक, जीव मुठीत धरुन जगणारा कात्रजकर' अशा प्रकारचा आशय या फोटोत लिहलेला दिसून येतो.

हा फोटो एका युजरने सोशल माध्यमांवर पोस्ट केला असून त्यावर एका युजरने प्रतिक्रिया देत सर्वांनी सार्वजनिक वाहतूक व्यवस्था वापरण्याचा सल्ला दिला आहे. तर, दुसऱ्या युजरने नागरिकांकडून मोठ्या प्रमाणावर कर वसूल करण्यात येत असून सेवा देणे हे महापालिकेचे काम असल्याचे म्हटले आहे. काहींनी हा पुण्याचा समृद्धी महामार्ग असल्याचेही म्हटले आहे.

दरम्यान, सातत्याने होणारे अपघात आणि रस्त्यााच्या स्थितीबाबत पालकमंत्री चंद्रकांत पाटील यांनी पाहणी केली आहे. त्यानंतर वाहतूक सुरळित करण्यासाठी १७५ वॉर्डनची नेमणूक करण्यासह कामाला गती आणि विविध उपाययोजना करण्यासंदर्भात आदेश दिले आहेत.