पुणे - पुणे शहरातील तलावांच्या परिसरात नागरिकांना बसण्यासाठी जागा उपलब्ध करून देणे, कारंजे बसविणे, रंगरंगोटी करणे यासह अन्य कामे करून ही ठिकाणे सुशोभित करण्यात येणार आहेत. त्यासाठी केंद्र शासनाच्या स्वच्छ भारत अभियानांतर्गत दोन कोटी रुपयांचा निधी महापालिकेला मिळाला आहे. कात्रज, पेशवे, पाषाण आणि मॉडेल कॉलनीतील लकाकी तलावाचा यामध्ये समावेश आहे.
पुणे शहराला भरपूर निसर्गसंपदा लाभली आहे. टेकड्या, नदी, तलाव यामुळे शहराचे सौंदर्य उजळून निघते. पण गेल्या काही वर्षापासून नदी व तलावांच्या परिसरात वाढती बांधकामे व लोकसंख्या यामुळे पर्यावरणावर परिणाम झाला आहे.
तलावामध्ये थेट सांडपाणी येत असल्याने पाणी अशुद्ध झाले आहे, परिसरात दुर्गंधी निर्माण झाल्याने नागरिकांना त्रास होतो. तसेच तलावात अशुद्ध पाण्यामुळे जलपर्णी वाढत असल्याने ती काढण्यासाठी वर्षाला सुमारे एक कोटी रुपयांचा खर्च येत आहे.
या तलावात येणारे सांडपाणी रोखण्यासाठी या परिसरात सांडपाणी वाहिन्या टाकल्या जात आहेत. हे काम अजून पूर्ण झालेले नाही. महापालिकेतर्फे स्वच्छ भारत अभियानात सहभाग घेतला आहे. त्यात तलाव सुशोभीकरणासाठी केंद्र शासनाकडे प्रस्ताव पाठवला होता, त्यातून चार तलावांसाठी दोन कोटी रुपयांचा निधी प्राप्त झाला आहे.
घनकचरा व्यवस्थापन विभागाने यासाठी निविदा प्रक्रिया राबविली होती. पाषाण तलावासाठी ४१ लाख ८८ हजार,कात्रज तलावासाठी ४१ लाख ८८ हजार आणि लकाकी तलावासाठी ४९ लाख ४२ हजार रुपयांच्या निविदा मंजूर झाल्या आहेत. तर पेशवे तलावासाठी ४९ लाख रुपयांचा खर्च केला जाणार आहे. या प्रस्तावांना स्थायी समितीच्या बैठकीत मान्यता देण्यात आली.
असे होणार सुशोभीकरण
- तलावातील पाण्यात कारंजे उभारणार, आकर्षक विद्युत रोषणाई करणार
- तलावाच्या लगत लाकडाची बाके बसविणार
- भिंतीचे रंगकाम केले जाणार
- तलावाच्या बाजूने नागरिकांना चालण्यासाठी पदपथ तयार केले जाणार
- तलावाला सीमा भिंत बांधणे
- हा परिसर कचरा मुक्त ठेवणार, कचरा टाकण्यांवर कारवाई
तलावाचे प्रदूषण रोखण्यासाठी उपाययोजना
- सांडपाण्यामुळे तलावातील पाणी दूषित झाले आहे, तेथे स्वच्छतेचे काम सुरु आहे.
- २०१७ मध्ये कात्रज तलावात येणारे सांडपाणी रोखण्यासाठी आराखडा
- दररोज दोन दशलक्ष लिटर सांडपाण्यावर प्रक्रिया करण्यासाठी प्रकल्प
- केंद्र सरकारच्या अमृत योजनेतून तलाव स्वच्छ करण्यास मान्यता दिली होती.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.