कात्रज सर्पोद्यान ते नारायणपूर पीएमपी बससेवा सुरु

कात्रज - 'पीएमपी'कडून (PMP) कात्रज सर्पोद्यान (Katraj Sarpodyan) ते सासवड मार्गे नारायणपूर (Narayanpur) हा नवीन बस (Bus) मार्ग (मार्ग-क्रमांक २९३) सुरू करण्यात आला आहे. आमदार भिमराव तापकीर यांच्या हस्ते बससेवेचा लोकार्पण सोहळा कात्रज-सर्पोद्यान येथे पार पडला. तसेच, श्री क्षेत्र नारायणपूर येथे श्री दत्तगुरूंच्या जयघोषात व टाळ-मृदंगाच्या गजरात बसचे स्वागत करत प पू श्री आण्णा महाराज यांच्या हस्ते बसचे पूजन करण्यात आले.

कात्रज येथे झालेल्या उद्घाटनास नगरसेविका वर्षा तापकीर, पीएमपीएमएलचे मुख्य वाहतूक व्यवस्थापक दत्तात्रय झेंडे, कात्रज आगार प्रमुख विजय रांजणे यांची उपस्थिती होती. या बससेवेचा मार्ग कात्रज सर्पोद्यान, वेळू फाटा, शिवापूर बाग, कोंढणपूर फाटा, खेड शिवापूर, वरवे, केळवडे फाटा, चेलाडी फाटा, कामथडी, कापूरहोळ, दिवळे, बालाजी मंदिर फाटा, केतकावळे, देवडी, चिव्हेवाडी, नारायण धाम, नारायणपूर, पोखर फाटा, भिवडी, वांढेकर वस्ती, घोरेवाडी, सासवड कोर्ट, चौखंडे आळी, जेजुरी नाका, सासवड असा असणार आहे.

यावेळी तापकीर म्हणाले, 'या बसमार्गामुळे नारायणपूर व बालाजी मंदिर येथे दर्शनासाठी जाणाऱ्या भाविकांची तसेच कापूरहोळ ते सासवड दरम्यानच्या विद्यार्थ्यांची चांगली सोय होईल'. झेंडे म्हणाले, 'या बसमार्गावर ३ बसद्वारे बससेवा उपलब्ध आहे. सर्पोद्यानपासून दर तासाला बस उपलब्ध असेल. सर्पोद्यान ते सासवड १२ खेपा व कापूरहोळ ते सासवड १६ खेपा होणार आहेत. सर्पोद्यान ते सासवड पहिली बस सकाळी ५ वाजता तर शेवटची बस संध्याकाळी साडेआठ वाजता आहे. तसेच सासवड ते सर्पोद्यान पहिली बस सकाळी साडेनऊ वाजता तर शेवटची बस संध्याकाळी साडेसात वाजात आहे. सासवड ते कापूरहोळ पहिली बस सकाळी साडेसहा वाजता तर शेवटची बस संध्याकाळी साडेसात वाजता आहे.