पोलिसाच्या मुलीचे अपहरण करुन गुंगीचे औषध देत केला बलात्कार; एकास अटक 

पुणे : कार शिकविण्याच्या बहाण्याने तरुणीचे अपहरण करुन तिला लुबाडण्याचा प्रकार काही दिवसांपुर्वीच शहरात घडला असतानाच, आता पोलिसाच्या मुलीचे तिच्या मित्रासह तिघांनी अपहरण करुन तिला नगरमधील नेवासा येथे नेत तिच्यावर बलात्कार केल्याचा धक्कादायक प्रकार पुढे आला आहे. सोमवारी रात्री आठ वाजता तरुणीचे वडगाव शेरी परिसरातून अपहरण करण्यात आले होते. याप्रकरणी तिघांविरुद्ध चंदननगर पोलिस ठाण्यात गुन्हा दाखल झाला आला असून एकास अटक करण्यात आली आहे. पोलिसाच्याच मुलीवर हा प्रसंग ओढावल्याने सर्वसामान्य नागरीकांची काय स्थिती असेल, असा प्रश्‍न निर्माण झाला आहे. 

- ताज्या बातम्यांसाठी डाऊनलोड करा ई-सकाळचे ऍप

- पुण्याच्या बातम्या वाचण्यासाठी येथे ► क्लिक करा

सागर मोहन सातव ( वय 28, रा.सातव वस्ती, वाघोली) याच्यासह त्याच्या दोन साथीदारांविरुद्ध चंदननगर पोलिस ठाण्यात गुन्हास दाखल झाला असून सातव यास अटक करण्यात आली आहे.  पोलिसांनी दिलेल्या माहितीनुसार, फिर्यादी तरुणीचे वडील पोलिस शिपाई आहेत. तरुणीची ते राहात असलेल्या परिसरातील एका तरुणाशी मैत्री होती. दरम्यान, संबंधीत तरुणी ही 21 डिसेंबरला रात्री आठ वाजता वडगाव शेरी येथून रस्त्याने एकटी जात होती. त्यावेळी सागर व त्याचे दोन साथीदार कारमधून तिच्याजवळ आले.

सागरने तरुणीला अडवून "मी तुझ्यासोबत लग्न करतो, तू माझ्या गाडीत बसली नाही तर मी जीवाचे बरेवाईट करून घेईल.' अशी धमकी देत त्याच्याकडे असलेली विषारी औषधाची बाटली तरुणीला दाखविली. या प्रकारामुळे घाबरलेली तरुणी त्यांच्या गाडीत बसली. त्यानंतर त्यांनी तरुणीला गाडीमध्येच गुंगीचे औषध दिले. त्यामुळे तरुणी अर्धवट बेशुद्ध झाली. त्यानंतर त्यांनी तिचे हातपाय बांधून तिला नगरमधील नेवासा येथे नेले. तेथे त्यांनी तरुणीवर बलात्कार केला. या प्रकारानंतर तरुणीला त्यांच्या कारमधून पुन्हा पुण्यात आणून सोडले. घडलेल्या प्रकारामुळे तरुणीला धक्का बसला, मात्र तिने हा प्रकार तिच्या कुटुंबीयांना सांगितला. त्यानंतर तिने तिघांविरुद्ध गुन्हा दाखल केला. या प्रकरणाचा तपास चंदन नगर पोलिस करत आहेत. 

कडाक्‍याच्या थंडीतही आंदोलनाची धग कायम; पुणे विद्यापीठात विद्यार्थ्यांचं आंदोलन सुरूच!