जुन्नर : वैरणीला आग लागल्याने शेतकऱ्याचे मोठे नुकसान

जुन्नर : उंडेखडक (ता. जुन्नर) येथील आदिवासी शेतकऱ्याने जनावरांसाठी साठवून ठेवलेल्या वैरणीला लागलेल्या आगीत सुमारे २५ हजाराचे नुकसान झाले आहे. महसूल विभागाच्या गाव कामगार तलाठ्याने या घटनेचा पंचनामा केला आहे.

उंडेखडक येथील देवराम दुलाजी नागरे यांनी आपल्या गट नंबर १७० मधील खळ्यात भाताच्या पेंढ्याची वैरण रचून ठेवली होती. ही वैरण त्यांच्या गुरांना वर्षभर पुरणार होती. मात्र शनिवारी (ता. १७) रोजी या वैरणीला सांयकाळी सात वाजण्याच्या सुमारास आग लागली. यात वैरणीचे तीनही उडगे जळून खाक झाले. दरम्यान, यामुळे आता जनावरांसाठी त्यांना वैरण विकत घेण्याची पाळी येणार असल्याचे नांगरे यांनी सांगितले.