रेटवडी येथे बिबट्यांचा महिलांवर हल्ला | Sakal
sakal

बोलून बातमी शोधा

Leopard Attack
रेटवडी येथे बिबट्यांचा महिलांवर हल्ला

रेटवडी येथे बिबट्यांचा महिलांवर हल्ला

दावडी - रेटवडी (Retwadi) (ता. खेड) पठाणवस्ती व सतारकावस्ती येथे मंगळवार (दि. १०) रोजी सायंकाळी साडेसहा व आठ वाजता दिड तासांच्या फरकाने दोन महिलांवर (Women) दोन बिबट्यांनी हल्ले (Leopard Attack) चढवल्याची घटना घडली असुन, आतापर्यंतची बिबट्याने हल्ला करण्याची ही चौथी वेळ असुन बिबट्यांचा तातडीने बंदोबस्त करावा अशी मागणी ग्रामस्थांनी केली आहे.

रेटवडीच्या पठाणवस्ती येथे रिजवणा अब्दुल पठाण या महिलेवर रस्त्याने एकट्या जात असताना बिबट्याने साडेसहाच्या दरम्यान हल्ला केला. हल्ला झाल्यावर ग्रामस्थांनी वनविभागास कळवले. राजगुरुनगरचे वनपरिक्षेत्र अधिकारी पी. एस. रौंधळ, वन परिमंडळ अधिकारी दत्तात्रय फापाळे, वनरक्षक शिवाजी राठोड संदीप अरुण व ढोले असे पथक पोहोचले. त्याठिकाणी पाहणी केली असता बिबट्या झुडुपात असल्याचे टॉर्चच्या उजेडात दिसुन आले. वनविभागाचे कर्मचारी व ग्रामस्थांनी मोठ्याने आरडाओरडा करून हुसकावण्याचा प्रयत्न केला तरीही बिबट्या जागेवरच उभा होता. त्याच वेळी आठ वाजता सतारकावस्ती येथे दुसऱ्या बिबट्याने महिलेवर हल्ला केल्याचे समजले.

सतारकावस्ती येथे रात्री आठचे सुमारास झालेल्या बिबट्याच्या हल्ल्यात अरूणा संजय भालेकर ही महिला गंभीर जखमी झाली आहे. बिबट्याने तोंडावर व डोक्याला पंजाने मारून व चावा घेऊन गंभीर जखमी केले आहे. भालेकर यांना ग्रामस्थांनी तातडीने चांडोली येथील ग्रामीण रूग्णालयात दाखल केले होते. मात्र डोक्याला झालेल्या जखमा खोल असुन जास्त रक्तस्त्राव झाल्याने त्यांना पुढील उपचारांसाठी पुणे येथे ससून रूग्णालयात दाखल केले आहे. मंगळवारी घडलेल्या घटना ताज्या असतानाच बिबट्याने बुधवारी (दि. ११) सकाळी सहाचे सुमारास वाबळदरा येथे कांताराम रेटवडे या शेतकऱ्याचे कुत्रे खाल्ले.

रिजवणा अब्दुल पठाण ही महिला किरकोळ जखमी असल्याने त्यांना राजगुरूनगर येथील खाजगी रूग्णालयात उपचार करून घरी सोडले आहे. दरम्यान वनविभागाच्या वतीने वाबळदरा येथे पिंजरा लावण्यात आला अाहे. रेटवडी वन परिसरात बिबट्या तरस यांसारखे वन्य प्राणी आहेत तरी ग्रामस्थांनी सावधानता बाळगणे जरूरी आहे. रात्रीचे वेळी एकटे फिरू नये. एकटे असल्यावर मोबाईलवर मोठ्याने गाणी लावावीत व वनविभाग वेळोवेळी देत असलेल्या सूचनांचे पालन करावे असे आवाहन वन परिमंडळ अधिकारी दत्तात्रय फापाळे यांनी केले आहे. वारंवार होणाऱ्या बिबट्यांच्या हल्ल्यांमुळे रेटवडी ग्रामस्थांमध्ये भीतीचे वातावरण पसरले असुन बिबट्यांचा तातडीने बंदोबस्त करावा अशी मागणी ग्रामस्थांकडून होत आहे.

Web Title: Leopard Attack On Womens

Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..
टॅग्स :attackwomenLeopard
go to top