मुस्लिम बांधवांनो, मशिदीत न जाता घरीच नमाज पठण होणार शक्य; वाचा ही महत्वाची बातमी

पुणे : कोरोना विषाणू साथीच्या पार्श्वभूमीवर सामूहिक नमाज पठण करू नये या आवाहनाचे पालन करीत पुण्यातील आझम कॅम्पस मशिदीत शुक्रवार (जुम्मा) नमाजचे 'फेसबुक लाईव्ह'द्वारे थेट प्रक्षेपण करण्यात येत आहे. मशिदीत न जाता घरी मशिदीच्या पेश इमाम यांच्या मार्गदर्शनाखाली नमाज पठण करणे नव्या तंत्रज्ञानाच्या वापराने शक्य झाले. अशा स्वरूपाचा हा पहिलाच उपक्रम आहे.

पुण्यातील `या` कंटेन्मेंट झोनमधील नागरिकांची होतीये उपासमार

या तंत्रामुळे मशिदीत गर्दी होत नाही, फक्त पेश इमाम मशिदीतून नमाज पठण करतात आणि इतरांना घरातून त्यात सहभागी होणे शक्य होते. दर शुक्रवारी दुपारी दीड वाजता हा उपक्रम होतो. आझम कॅम्पस शैक्षणिक, सामाजिक परिवाराचे अध्यक्ष डॉ. पी. ए. इनामदार यांनी पत्रकाद्वारे या उपक्रमाची माहिती दिली.२९ मे च्या शुक्रवार पासून या उपक्रमाला सुरुवात झाली.   

ताज्या बातम्यांसाठी डाऊनलोड करा ई-सकाळचे ऍप

एरवी शहराच्या विविध भागात मशिदींमध्ये शुक्रवार (जुम्मा) दिवशी सामूहिक नमाज पठण केले जाते. कोरोना संसर्गचा धोका लक्षात घेऊन शुक्रवारी मशिदीत जाता येत  नाही. त्यामुळे सर्वांना या फेसबुक लाईव्ह नमाज पठणाचा लाभ होत आहे. आझम कॅम्पस या फेसबुक पेजवर हे लाईव्ह प्रक्षेपण करण्यात येते. प्रशासनाने दिलेल्या सर्व सूचनांनुसार सोशल डिस्टन्स चे नियम पाळण्यात येतात. पुढील लिंकद्वारे या नमाज पठणात सहभागी होता येते.  

https://www.facebook.com/azamcampus1922

या आधी रमजान ईदच्या दिवशी देखील सकाळी ८ वाजता आझम कॅम्पस मशिदीमध्ये पेश इमाम असलेले मौलाना नसीम अहमद यांनी ईद साठीचे नमाज पठण केले. नेहमीच्या शिरस्त्या प्रमाणे सुरुवातीला नमाज पठण कसे करायचे याचे मार्गदर्शन करण्यात आले. मग, ईद -उल -फित्रची नमाज अदा करण्यात आली. त्यानंतर थोडक्यात खुतबा पढण्यात आला आणि दुआ सांगण्यात आली.

 पुणे : मुंबई- बंगळुरू एक्प्रेसवेवर धावतायेत आर्थिक गतीची चक्रे    

पेश इमाम यांच्या पाठोपाठ हे लाईव्ह प्रक्षेपण पाहणाऱ्या बांधवानी घरी  नमाज अदा केली. सुमारे ५ हजार बांधवांनी हे प्रक्षेपण सकाळच्या वेळी पाहिले होते. आझम कॅम्पसच्या माहिती तंत्रज्ञान विभागाचे प्रमुख अमीन शेख यांनी तांत्रिक बाजू सांभाळली होती.